Nga 10 qershori 2026 do të nisë zbatimi i ligjit për faljen dhe shuarjen e një pjese të detyrimeve tatimore dhe doganore për bizneset dhe tatimpaguesit në Shqipëri. Masa parashikon lehtësime për detyrimet e krijuara ndër vite, përfshirë fshirjen e gjobave, kamatëvonesave dhe në disa raste edhe të një pjese të principalit.
Sipas njoftimit të Administratës Tatimore, tatimpaguesit që kanë detyrime për periudhën 2015–2019 mund të përfitojnë falje deri në 50% të principalit nëse kryejnë pagesën brenda afateve të përcaktuara.
Për detyrimet e periudhës 1 janar 2015 – 31 dhjetor 2019:
Shuhet 50% e detyrimit principal nëse paguhet 50% e mbetur nga 10 qershori deri më 30 qershor 2026; Shuhet 25% e principalit nëse paguhet 75% e mbetur deri më 31 dhjetor 2026. Në të dy rastet, gjobat dhe kamatëvonesat do të fshihen plotësisht.
Ndërkohë, për detyrimet e krijuara gjatë viteve 2020–2024, ligji parashikon fshirjen e plotë të gjobave dhe interesave, me kusht që të paguhet 100% e principalit deri më 31 dhjetor 2026.
Administrata Tatimore sqaron se do të hartojë brenda 20 ditëve nga hyrja në fuqi e udhëzimit listën e subjekteve që përfitojnë dhe atyre që përjashtohen nga skema. Njoftimet do të dërgohen elektronikisht përmes sistemit “e-Filing”. Ligji parashikon gjithashtu:
Fshirjen e detyrimeve për subjektet e çregjistruara deri më 31 dhjetor 2024; Faljen e gjobave për deklarime të vonuara, nëse deklaratat dorëzohen deri më 30 qershor 2026; Fshirjen e gjobave administrative dhe të interesave të krijuara nga ndryshime ligjore ose vendime gjyqësore.
Nga përfitimet përjashtohen subjektet e dënuara me vendim të formës së prerë për vepra penale tatimore apo doganore, si edhe ato që janë aktualisht nën hetim ose në proces gjyqësor për këto çështje.
Tatimpaguesit që kanë çështje në apel administrativ ose gjyqësor mund të përfitojnë vetëm nëse heqin dorë nga ankimi ose padia përkatëse brenda afateve të përcaktuara nga ligji.
Administrata Tatimore u bën thirrje bizneseve dhe individëve të verifikojnë situatën e tyre në sistemin “e-Filing” dhe të kryejnë pagesat në kohë për të përfituar nga lehtësitë fiskale të parashikuara.
