Krahas konfirmimit të tij në krye të Partisë Demokratike, në një proces pa rival dhe duke kapërcyer mbi ‘nenin Basha’ që shkroi vetë, Sali Berisha pritet të rikonfigurojë edhe kupolën e partisë pas zgjedhjeve të 23 majit, përmes Kuvendit Kombëtar.
Një javë pas rikonfirmimit të pritshëm të Berishës, ky i fundit do të mbledhë Kuvendin Kombëtar të PD-së për miratimin e disa ndryshimeve në statut dhe në kupolën drejtuese.
Sipas burimeve, përmes Kuvendit Kombëtar, Berisha ka planifikuar spostimin e Flamur Nokës nga posti i Sekretarit të Përgjithshëm të PD, duke e ngarkuar me një funksion honorifik. Në vend të Flamur Nokës është projektuar për t’u emëruar Belind Këlliçi, duke u konfirmuar deri diku edhe si një opsion i mundshëm në të ardhmen si pasardhës i Berishës në krye të partisë. Në raport dhe rivalitet të heshtur me Gaz Bardhin, Belo Këlliçi është për momentin personazhi më i afërt dhe i besuar i Shkëlzen Berishës, i cili është kryetari operacional i PD-së.
Nga ana tjetër, edhe pse besnikëria e tij e verbër ndaj Doktorit nuk është vënë kurrë në diskutim, Flamur Noka shihet nga Berisha dhe Familja e tij si një kosto gjithnjë në rritje dhe e panevojshme për partinë dhe imazhin e saj. Noka pritet të spostohet dhe t’i fshihet fytyra në kuadër të përpjekjeve të ndryshimit të imazhit të partisë, duke ofruar figura më të moderuara dhe të pranuara nga shoqëria shqiptare.
