Një ngjarje tragjike ka tronditur së fundmi komunitetin shqiptar në New York pasi u nda jeta në mënyrë tragjike 56-vjeçarja shkodrane, Donike Gocaj, e cila ra brenda një pusetë të pambuluar, thellësia e të cilës arrinte 3 metra.
Ngjarja e rëndë ndodhi mbrëmjen e së hënës rreth orës 23:19 pranë Fifth Avenue në Manhattan, ku shqiptarja sapo doli nga makina me të cilën udhëtonte SUV tip “Mercedes Benz” përfundoi në një pusetë të hapur e cila i shkaktoi vdekjen e menjëhershme.
Mësohet se në momentin kur zbriti nga makina, shqiptarja bëri një hap pas ku këmbët i ranë në pusetë dhe trupi i saj u zhduk nga sipërfaqja.
Sapo e panë, disa qytetarë të pranishëm u afruan për ta ndihmuar, madje raportohet se njëri prej tyre mori një palë shkallë për të zbritur e për të tërhequr trupin e shkodranes, por ndërhyrja e tij ishte e pamundur për shkak të thellësisë së pusetës.
Në pritje të mbërritjes së ekipeve të emergjencës, qytetarët e pranishëm në momentin tragjik të ngjarjes janë shprehur se për disa minuta dëgjohej zëri i Donikës e cila bërtiste për të kërkuar ndihmë.
Me të mbërritur në vendngjarje zjarrfikësit ndërhynë menjëherë ku përmes disa shkallëve u përpoqën për të hyrë në pusetë. Pavarësisht ndërhyrjeve dhe përpjekjeve për të shpëtuar shqiptaren, Donike Gocaj u nxorr nga puseta pa shenja jete.
Ajo u transportua me urgjencë në spital, por fatkeqësisht kishte ndërrua jetë që në vendngjarje.
Ndërsa raportohet se në vendngjarje nuk kishte asnjë tabelë paralajmëruese apo barriera mbrojtëse rreth pusetës së hapur.
Në lidhje me këtë situatë që ka tronditur jo vetëm New Yorkun por dhe Shqipërinë, e më së shumti qytetin e Shkodrës ku Donika kaloi vitet e rinisë së saj Christopher J. Gorayeb deklaroi se raste të tilla nuk janë të rralla në New York dhe se mbulesat duhet të jenë të siguruara në mënyrë që të mos lëvizin aksidentalisht.
Nga ana tjetër, kompania përgjegjëse Con Edison prtetendon se referuar pamjeve të sigurisë dyshohet se kapaku i pusetës ishte zhvendosur pak minuta më herët nga kalimi i një kamioni të rëndë në rrugë. Ndërsa janë shprehur se afro 12 minuta më vonë viktima parkoi makinën pranë vendit ku ndodhi tragjedia.
‘Jemi thellësisht të trishtuar të konfirmojmë se një anëtar i publikut ka vdekur pasi ra në një pusetë të hapur’, tha zëdhënësi i kompanisë.
‘Po hetojmë në mënyrë aktive se si ndodhi kjo.’ Punëtorët e ndërtimit vunë në dyshim mungesën e masave të sigurisë. “Nuk duhej të kishte ndodhur kurrë. Duhet ta kishin mbuluar përsëri ose të kishin vendosur diçka përreth,” deklaroi një punëtor.
Humbja e Donikes ka shkaktuar një plagë të pashërueshme për djalin e saj Armandon dhe nusen Caitlin, të cilët mësohet se jetonin shumë pranë 56-vjeçares në New York, si dhe për vajzën e saj Esterinën. Përveçse një mama e përkushtuar mësohet se Donika ishte dhe gjyshe e dy djemve të vegjël, Zayn dhe Abel.
Kjo konfirmohet dhe nga dedikimet që shkodranja u ka bërë nipërve në Facebook-un e saj për ditëlindjet e tyre.
Lajmi i trishtë ka tronditur mbarë shqiptarët pasi ngjarja e pazakontë i ka marrë jetën shqiptares në një moshë jo dhe aq madhore.
Bëhet me dije se ceremonia mortore do të zhvillohet më 22 maj në New York në orën 11 të mëngjesit, e pastaj do të kryhet varrimi i saj në varrezat “Gate of Heaven Cemetery” 10 West Stevens Avenue, Hawthorne, NY.
Comments are closed.