Kryepolici i DVP Tiranë, Oliger Torba ka konfirmuar se i riu Eglant Koçi është vrarë dhe tashmë shërbimet policore janë në kërkim të trupit të tij. Në një konferencë për shtyp, Torba ka sqaruar se po kërkohet në rrethinat e Tiranës, përgjatë kufirit ndarës mes Elbasanit dhe Tiranës.
“Fillimisht, Komisariati NR.2 ka kryer të gjitha procedurat, më pas duke bërë një analizë të thelluar të ngjarjes, është gjykuar dhe hetimi po ndiqet nga struktura e krimeve të rënda e Drejtorisë së Policisë Tiranës.
Nga ana jonë dhe aktualisht që po flasim, është ngritur një strukturë e posaçme që po kërkon në lidhje me trupin e shtetasit Eglant Koçi. Kërkimet janë shtrirë kryesisht në rrethinat e Tiranës, kufirit ndarës mes Elbasanit dhe Tiranës”, është shprehur ai.
Kryepolici i Tiranës ka treguar se nga Kosova ka ardhur një grup i posaçëm kërkim, pjesë e Forcës së Sigurisë së Kosovës, i cili po ndihmon për gjetjen e trupit të Eglant Koçit.
“Aktualisht krahas shërbimeve të Policisë së Shtetit, një ndihmë na ka ardhur edhe një njësi e posaçme nga FSK, po vijon kërkimi, deri tani nuk kemi pasur ndonjë rezultat konkret. Janë kontrolluar shumë zona ku kishim dyshimet tona pas analizave. Kërkimi vijon”, është shprehur Oliger Torba.
Sot, bëhen dhjetë ditë nga zhdukja pa gjurmë e 34 vjeçarit Eglant Koçi dhe dyshimet e shërbimeve të Policisë së Shtetit, pas deklaratave të kamarierit Enea Zyferi, janë se ai mund të jetë vrarë nga miku i tij Armand Shakaj.
Comments are closed.