Gjashtë persona humbën jetën pasi dy helikopterë u përplasën në ajër dhe më pas u rrëzuan në zonën Recreio dos Bandeirantes, në pjesën jugperëndimore të Rio de Janeiros, mëngjesin e së dielës.
Sipas dëshmitarëve, dy mjetet fluturuese u përplasën gjatë fluturimit në rrethana që mbeten ende të paqarta. Autoritetet konfirmuan se asnjë nga personat që ndodheshin në bord nuk arriti të mbijetojë.
Copat e helikopterëve u shpërndanë në një zonë të gjerë Sipas shërbimeve të emergjencës, mbetjet e dy helikopterëve u shpërndanë në një rreze prej të paktën 100 metrash. Disa pjesë të avionëve përfunduan edhe mbi çatitë e ndërtesave pranë vendit të aksidentit. Në operacionin e shpëtimit dhe të sigurisë morën pjesë rreth 45 zjarrfikës me 15 automjete. Për arsye sigurie, autoritetet ndërprenë përkohësisht qarkullimin në bulevardin bregdetar Avenida das Américas. Pak orë më vonë, zjarri i shkaktuar nga përplasja u vu nën kontroll, ndërsa ekipet teknike nisën kontrollet për rrjedhje të mundshme karburanti dhe rreziqe të tjera për zonën përreth.
Nis hetimi për shkaqet e aksidentit
Forcat Ajrore të Brazilit njoftuan se është aktivizuar Qendra për Hetimin dhe Parandalimin e Aksidenteve Ajrore (CENIPA), e cila ka nisur mbledhjen e provave dhe hetimet paraprake për të përcaktuar shkaqet e tragjedisë.
Autoritetet pritet të analizojnë të dhënat e fluturimit, komunikimet mes pilotëve dhe kushtet e operimit të dy helikopterëve, në përpjekje për të zbardhur rrethanat që çuan në aksidentin fatal
Comments are closed.