Hita: Ka mbaruar koha e “gjuetisë” së gjobave, kemi hyrë në epokën e monitorimit inteligjent

Drejtori i Përgjithshëm i Policisë së Shtetit, Skënder Hita, ishte i pranishëm këtë të premte në aktivitetin e organizuar në kryeqytet, në sheshin “Nënë Tereza”, në kuadër të sensibilizimit për sigurinë rrugore.

Gjatë fjalës së tij, kreu i Policisë u shpreh se monitorimi i shkeljeve rrugore ka hyrë në epokën e monitorimit inteligjent, ku, nëpërmjet mjeteve inteligjente, do të evidentohen në kohë reale shkeljet rrugore.

Ndërkohë, Hita u bëri thirrje shkollave, të rinjve dhe familjarëve që të ndërgjegjësohen, të vendosin rripin e sigurimit dhe të anashkalojnë përdorimin e telefonit gjatë drejtimit të mjetit.

“Koha e ndalimeve pa shkak apo e “gjuetisë” së gjobave ka mbaruar. Policia e Shtetit ka hyrë në epokën e monitorimit inteligjent. Nëpërmjet mjeteve inteligjente si pajisjet “Poliscan”, dronët e cilësisë së lartë dhe radarët automatikë, ne evidentojmë shkeljet në kohë reale pa ndërprerë rrjedhën e trafikut dhe pa krijuar stres të panevojshëm te drejtuesit e rregullt të mjeteve. Ky është një hap i rëndësishëm drejt një policimi më profesional, më të saktë dhe më transparent, por, teknologjia nuk na shpëton dot nëse mungon vetëdija.

Nxënësit dhe të rinjtë janë brezi që formëson kulturën e ardhshme të qarkullimit rrugor, ndaj edukimi i tyre që në moshë të hershme është investimi më i rëndësishëm për një Shqipëri më të sigurt.

Kjo është arsyeja pse ne po bashkëpunojmë fort me institucionet arsimore, sepse fëmijët dhe nxënësit tanë kanë një impakt të jashtëzakonshëm sensibilizues. Kur një fëmijë i thotë prindit në makinë, “Vendos rripin!” apo “Mos fol në telefon!”, ai mesazh vlen më shumë se dhjetëra gjoba të Policisë”, u shpreh ai.

Sakaq, Hita u ndal edhe te sezoni turistik, ku sipas tij Policia e Shtetit ka hartuar një plan masash të detajuar, ku fokusi kryesor do të jetë te pikat e trafikut, akset bregdetare dhe siguria rrugore.

“Teksa jemi në kulmin e sezonit turistik dhe siguria rrugore ka një rëndësi të veçantë në mbarëvajtjen e këtij sezoni, pavarësisht se vitet e fundit Shqipëria është pothuajse tërë vitin, në sezon turistik.

Kemi hartuar plane të detajuara masash për menaxhimin e fluksit të madh të automjeteve që gjatë verës shumëfishohen. Fokusimi ynë do të jetë maksimal në pikat nevralgjike të trafikut, në akset bregdetare dhe turistike, duke bërë të mundur rritjen e parametrave të sigurisë rrugore, lehtësimin e qarkullimit dhe një shërbim mikpritës e më profesional për çdo qytetar dhe turist që zgjedh vendin tonë. Siguria rrugore është një kontratë sociale ku secili ka një pjesë të detyrës.

Është kontribut i drejtuesve të motomjeteve që duhet të vendosin kaskën, dhe i drejtuesve të automjeteve që të respektojnë përparësinë në lëvizje dhe zbatojnë me rigorozitet rregullat e qarkullimit rrugor.

Është kontribut i autoshkollave, që nuk duhet të nxjerrin në rrugë thjesht njerëz me patentë, por shoferë të përgjegjshëm.

Është kontribut i shkollave, i çdo prindi, i institucioneve përgjegjëse dhe i mbarë shoqërisë. Çdo qytetar duhet të kuptojë se siguria rrugore fillon nga vetë përgjegjësia personale.

Duke bërë secili pjesën e vet, duke ndarë eksperiencat më të mira sensibilizuese, si kjo e sotmja me EVU-në, dhe duke rritur bashkëpunimin ndërinstitucional dhe bashkëpunimin me qytetarët, do të kemi rrugë më të sigurta dhe më shumë jetë të shpëtuara”, është shprehur ai.