Familja e aktorit shqiptar Gjergj Lala i cili u nda nga jeta para pak ditësh, mësohet se ka ngritur padi ndaj kundër Poliklinikës Umberto I, të cilët i akuzojnë për neglizhencë.
“Babai ynë vdiq para syve tanë, pa bërë askush asgjë për ta ndihmuar” janë shprehur familjarët e aktorit, raporton Corriere della sera.
Për rrjedhojë, mësohet se Prokuroria e Romës ka nisur hetimet për veprën penale “vrasje të paqëllimshme” për vdekjen e 78-vjeçarit.
Deri më tani raportohet se nga ngjarja nuk ka akoma të dyshuar. Përpara se të ngrejë akuza rreth vdekjes së aktorit shqiptar, Prokuroria synon të lexojë së pari gjetjet e autopsisë.
Kjo pasi, thuhet se kur aktori mbërriti në Poliklinikë, gjendja shëndetësore e tij ishte shumë komplekse. Megjithatë, familja e tij nuk pretendon se gjendja e aktorit nuk ishte aq sa situata të përshkallëzohej në mënyrë tragjike.
Vështirësia e Lalës filloi më 14 maj, kur djemtë e tij, Renato dhe Klaudio, e çuan atë në urgjencën e Spitalit Frosinone me një status të kodit blu për shkak të një komplikacioni në veshka.
Aktori, familja e të cilit është ndihmuar nga avokati Carlo Maria Consalvo, i ishte nënshtruar një operacioni shpëtimtar për një tumor në fshikëz disa javë më parë.
Pas tetë orësh, ekipi mjekësor i spitalit vendosi ta transferonte Lalën në Poliklinikën Umberto I.
Situata kërkonte masa të përshtatshme duke pasur parasysh ashpërsinë e rastit. Në spitalin Umberto I, u vendos që Lala të pranohej me status të kodit të kuq.
Gjatë qëndrimit të tij në spital, u zbuluan disa komplikacione. Ndër më të dukshmet ishte një frakturë e femurit, por se si ajo ndodhi ishte e paqartë.
Kështu, Lala iu nënshtrua një operacioni për të ripozicionuar kateterin në veshkën e tij dhe pas operacionit, ai u infektua me bakterin Klebsiella. Ai u shërua brenda njëzet ditësh, mirëpo akoma nuk ishte në gjendje të shëndetshme.
Që nga ai moment, gjendja e tij fizike u përkeqësua me shpejtësi. Ai u infektua përsëri me një bakter, i cili, sipas familjes ishte fatal.
Për rrjedhojë, Prokuroria e Romës prej ditësh ka nisur hetimet për zbardhjen e plotë të rastit.
