Një pasdite e qetë vere u kthye në dramë në liqenin Vico një nga zonat më piktoreske vullkanike në rajonin e Tuscias, Itali. Prej disa orësh vijojnë kërkimet për gjetjen e Luigi Cavallari, bashkëshortit të ministres italiane Eugenia Roccella.
Sipas informacioneve paraprake, Cavallari, 84 vjeç, ishte në një varkë me bashkëshorten e tij kur u hodh në ujë për të notuar, por papritur nuk u pa më të dilte në sipërfaqe. Ishte vetë ministrja ajo që dha alarmin dhe njoftoi autoritetet.
Menjëherë në zonë nisën operacionet e kërkimit. Në vendngjarje kanë ndërhyrë zhytësit e zjarrfikësve, ndërsa gjatë natës kërkimet janë vijuar edhe me mjete të specializuara, përfshirë një robot nënujor me telekomandim. Për gjetjen e tij janë angazhuar ekipe zhytësish nga Roma, Napoli dhe Firence, të pajisur me mjete për kërkime në ujëra me shikueshmëri të ulët.
Autoritetet ende nuk kanë përcaktuar shkaqet e zhdukjes së tij. Operacioni paraqitet i vështirë pasi liqeni i Vico-s ka një thellësi që arrin deri në rreth 50 metra dhe kushte të ndërlikuara në fundin e tij.
Luigi Cavallari është i njohur edhe për karrierën e tij akademike. Ai është profesor në Universitetin “Gabriele d’Annunzio” të Chieti-Pescara dhe studiues në fushën e teknologjisë së arkitekturës. Ai dhe ministrja Roccella janë të martuar prej dekadash dhe kanë dy fëmijë.
