E tronditur dhe e shokuar, me zë që i dridhet dhe në ngashërim, nëna e 17-vjeçares që u dhunua barbarisht nga 3 vajza të tjera në Fier, ka rrëfyer ngjarjen mes lotësh, si mësoi të vërtetën, videon, denoncimin dhe tmerrin që ka përjetuar.
Në News24, ajo ka treguar gjithçka, por më shumë gjendjen emocionale të saj, familjes dhe të bijës, që ende është e tronditur nga ajo që ka ndodhur.
Nëna kërkon vetëm drejtësi, teksa shpjegon se vajza e saj nuk ngacmonte kurrë njeri dhe ishte e urtë.
“Kishte shenja në fytyrë, sy të nxirë. Kokën çfarë t’i shikojë, flokë të shkulur, shenja e në trup. U mundova t’i zbuloja diçka, e shihja të shqetësuar, por më kot. U mundova t’i nxirrja diçka, por nuk tregonte. Pastaj mësova për videon në rrjetet sociale. Pastaj më tregoi se çfarë kishte ndodhur. I thashë të çoj në kurs, por më tha ja çfarë më ndodhi, “kështu ndodhi o ma” më tha. I thashë mos i kë bërë gjë gocave, jo më tha mami, nuk i bëra asgjë. Atë ditë që kishte dalë nga kursi i kishin dalë para. Po pse i thashë moj mami, ajo nisi të qante, i nisën të dridhurat, po qante”, tregon nëna mes ngashërimave e tronditur.
Pasi mësoi ngjarjen, ajo shprehet se kishte vendosur t’i drejtohej Policisë me denoncim, bashkë me të bijën. Por 17-vjeçarja ndihej e frikësuar se asgjë nuk po ndodhte dhe shfaqi shqetësime psikologjike, hetimet nuk po ecnin.
“Shkuam te Policia, bëmë denoncim në Komisariat, shkuam bashkë, e çuan edhe te shtëpia ku ndodhi ngjarja. Pritëm një ditë, dy, tre, katër, pas katër ditësh çupa u sëmur. O mami do ta nxjerrin më tha, prita por asnjë kontakt. Vajta në polici, u tregova videon, nuk më pranonte njeri. I ruajta videot në telefon, por kur pashë videon ashtu, nuk më mbante vendi, mbase edhe ato nënat e vajzave nuk dinin gjë, por çdokush ta kthejë thikën nga ana e tij e të mendojë. Unë jam në punë deri në orën 4, nëse vajza është e sëmurë unë do kujdesem ta shëroj. Vajza është e sjellshme, e urtë, nuk ngacmon njeri”, tha ajo mes të tjerash.
Nëna frikësohet se e bija është ndjerë nën presion dhe e kërcënuar, madje edhe e kishte vizituar, por mjekët i kishin thënë se nuk kishte asgjë. Ishte pritur një muaj që autoritetet të viheshin në lëvizje, vetëm pasi video u publikua.
“Ku ta di unë se vajza nuk ka pasur stres dhe presion nga më përpara, nga ta di unë? E çova për vizitë, doktori më tha se nuk ka asgjë. Kishim frikë, se mos vjen dikush, shikonim. Vajta edhe në polici, u bë një muaj, çfarë u bë me rastin, më kanë dhunuar vajzën gocat, janë zënë gocat i thashë. Unë kërkoj të drejtën e fëmijës tim”, vijoi ajo e shokuar.
Por ngjarja nuk ka kaluar pa pasoja, teksa tronditja më e madhe ka qenë publikimi i videos dhe pamjet e dhunës, që shoqëroheshin me thirrjet për ndihmë të 17-vjeçares. Nëna thotë se nuk vë gjumë në sy prej një muaji.
“Kam një muaj nuk më zë gjumi, kam atë videon e shoh dhe s’më zë vendi, goca ime po dhunohet, goca më kërkon ndihmë e thotë “o ma” dhe e shoh kur e dhunojnë vajzën time dhe unë jam këtu. Vajta e në Polici, vajta e në Prokurori. Kam tre vajza. I thashë vajzës do iki të gjej zgjidhje. Ku po shkon o mami më tha, do iki i thashë nuk duroj dot, të gjej zgjidhje. Nuk duroj dot kështu të shoh vajzën time që dhunohet e thërret “o ma”. Vajza ime nuk ngacmonte njeri, shikonte punën e saj”, përfundon ajo.
