David Sánchez, vëllai i kryeministrit të Spanjës, Pedro Sánchez, është dënuar me ndalim të ushtrimit të çdo funksioni publik për nëntë vjet, njoftoi sot drejtësia spanjolle.
Megjithatë, ai u shpall i pafajshëm për akuzën e ushtrimit të ndikimit të paligjshëm, vepër penale që mund ta kishte çuar në burg.
David Sánchez, 52 vjeç, akuzohej se kishte përdorur ndikimin e vëllait të tij të madh që nga viti 2016, përpara se Pedro Sánchez të bëhej kryeministër, për të siguruar emërimin e tij në një post në provincën e Badajozit, në jugperëndim të Spanjës, gjatë vitit pasues.
Sipas gjykatës, krijimi i këtij posti nuk ishte “as i nevojshëm dhe as urgjent”, duke vlerësuar se ai i shërbente “interesit të veçantë të përfituesit dhe jo interesit të përgjithshëm”. Në vendim, sipas Agjencisë Franceze të Lajmeve (AFP), gjyqtarët theksojnë se “kjo praktikë, që nuk respekton standardet etike, dëmton shëndetin e demokracisë, nxit korrupsionin dhe cenon barazinë e mundësive”.
Pasi u shpall fajtor për “sjellje të papërshtatshme administrative”, David Sánchez u dënua me ndalim të mbajtjes së çdo posti apo funksioni publik, si edhe me heqjen e së drejtës për t’u zgjedhur në funksione publike për një periudhë prej nëntë vitesh.
Gjyqi ndaj tij, së bashku me të pandehur të tjerë, u zhvillua nga fundi i muajit maj deri në fillim të qershorit.
David Sánchez i ka mohuar akuzat, ndërsa Prokuroria e Përgjithshme kishte kërkuar shpalljen e tij të pafajshëm.
“Shpresojmë që instancat më të larta gjyqësore të konfirmojnë pafajësinë e David Sánchez, në të cilën ne besojmë”, deklaroi zëdhënësja e qeverisë, Elma Saiz, pas mbledhjes së Këshillit të Ministrave.
Kompozitor dhe dirigjent orkestre, David Sánchez mbante të paktën deri në fillim të vitit 2025 këtë post, i cili varej nga Këshilli Krahinor i Badajozit, atëherë i drejtuar nga Partia Socialiste Spanjolle (PSOE), e udhëhequr nga Pedro Sánchez.
Përveç këtij rasti, edhe çështje të tjera gjyqësore prekin rrethin e afërt të kryeministrit socialist Pedro Sánchez. Opozita ka kërkuar dorëheqjen e tij dhe shpalljen e zgjedhjeve të parakohshme.
Përveç vëllait të tij David, edhe dy persona që luajtën një rol të rëndësishëm në ardhjen e Pedro Sánchez në pushtet në vitin 2018, Santos Cerdán dhe ish-ministri i Transportit José Luis Ábalos, pritet të përballen ose janë përballur tashmë me procese gjyqësore për çështje korrupsioni.
Ky i fundit u dënua në fund të muajit qershor me 24 vite burg për korrupsion.
Edhe bashkëshortja e Pedro Sánchez, Begoña Gómez, mund të dalë së shpejti para gjykatës, nën akuzën për ushtrim të ndikimit të paligjshëm.
Ndërkohë, që nga muaji maj, edhe paraardhësi socialist i Pedro Sánchez në krye të qeverisë spanjolle, José Luis Rodríguez Zapatero, i cili ishte kryeministër nga viti 2004 deri në vitin 2011 dhe konsiderohet një figurë e respektuar e së majtës, përballet gjithashtu me akuza për ushtrim të ndikimit të paligjshëm në këmbim të përfitimeve.
