Një ngjarje e rëndë ka ndodhur në Itali, ku ka ndërruar jetë vajza 11-vjeçare që kishte mbetur e bllokuar me flokët në grykën e thithjes së ujit të një pishine të vogël në Sestri Levante.
Vajza ishte dërguar me urgjencë në spitalin pediatrik Gaslini në gjendje kritike, por fatkeqësisht nuk arriti të mbijetojë.
Vdekja e saj u konfirmua nga drejtoria shëndetësore e spitalit Gaslini dhe u shpall gjatë natës, pasi përfunduoi periudha e vëzhgimit dhe të gjitha ekzaminimet klinike të parashikuara nga protokolli mjekësor.
Ndërkohë gjesti i prindërve të së miturës ka prekur të gjithë. Ata kanë dhënë pëlqimin për dhurimin e organeve të saj.
“I gjithë spitali i qëndron pranë familjes në këtë moment dhimbjeje të paimagjinueshme dhe shpreh mirënjohjen e thellë për një zgjedhje që arrin ta shndërrojë një humbje të pazëvendësueshme në shpresë konkrete për familje të tjera”, thuhet në njoftimin e spitalit.
Është një ngjarje shumë e rëndë dhe tragjike.
