Kryeministri Edi Rama këtë të hënë po zhvillon një takim në Qendrën Sociale “Jonathan” ku në fokus është mbështetja ekonomike e fëmijëve dhe të rinjve me aftësi të kufizuar. Rama gjatë fjalës së tij u shpreh se plani Kombëtar i Veprimit për Personat me Aftësi Ndryshe 2026-2030 parashikon dyfishimit e mbështetjes ekonomike, më shumë shërbime në komunitet, akses më të lehtë në arsim, punësim dhe rehabilitim, si dhe mbështetje më të madhe për jetesë të pavarur.
Ai theksoi se 11.000 fëmijë dhe të rinj që do të përfitojnë nga kjo masë. Ndër të tjera, Rama theksoi se buxheti i shtetit do të paguajë sigurimet shoqërore dhe shëndetësore për të gjitha nënat të cilët kanë fëmijë me aftësi të kufizuar.
“Ishte bërë një kohë e gjatë që mbështetja për këta fëmijë ishte bërë e pamjaftueshme. Jo se ishte dhe jo se është e mjaftueshme, se s’është asnjëherë mjaft, por ishte bërë realisht e pamjaftueshme, duke pasur parasysh edhe kostot e jetesës, edhe vështirësitë e tjera. Dhe e premtuam dyfishimin e mbështetjes për ta dhe jam shumë i lumtur që sot mbështetja për ta është dyfishuar.
Nuk janë pak, janë 11.000 fëmijë dhe të rinj që do të përfitojnë nga kjo masë. Por përtej kësaj kemi marrë dhe një masë tjetër të rëndësishme, që ishte një kërkesë e vazhdueshme dhe nga ju për kujdestarët.
Sepse një nënë që i përkushtohet një fëmije me aftësi të veçanta, e ka të pamundur të shkojë rregullisht në punë siç shkojnë nënat e tjera. Dhe duke qenë se nuk shkon në punë, përballet me problemin e mungesës së sigurimeve shoqërore dhe shëndetësore, gjë që e cenojnë pastaj padrejtësisht edhe mundësinë për të marrë një pension të merituar nesër apo për të pasur akses në sistemin shëndetësor ashtu si duhet. Kështu që ne vendosëm po ashtu që shteti, buxheti i shtetit t’i paguajë sigurimet shoqërore dhe shëndetësore për të gjitha nënat”, tha ai ndër të tjera.
