Një lajm i trishtë ka ardhur nga bota e shkencës në vendin tonë, ku studiuesi i njohur i trashëgimisë kulturore, Emin Riza është ndarë nga jeta në moshën 89-vjeçare.
Lajmi është bërë i ditur nga Akademia e Shkencave e Shqipërisë përmes një postimi në rrjetet sociale, ku shpreh ngushëllimet për humbjen e një prej figurave më të rëndësishme të kërkimit shkencor në vend.
Riza ishte një nga emrat më të rëndësisht të studimit, dokumentimit dhe mbrojtjes së trashëgimisë materiale shqiptare. Ai ka punuar si studiues, pedagog dhe specialist në Institutin e Monumenteve të Kulturës, si dhe ka dhënë një kontribut të jashtëzakonshëm në ruajtjen dhe promovimin e monumenteve dhe arkitekturës tradicionale shqiptare.
Emin Riza ishte autor i 16 monografive, pesë prej tyre në bashkautorësi, si dhe i 134 artikujve shkencorë të botuar në revista të specializuara.
Po ashtu Emin Riza është nderuar me titullin “Qytetar Nderi” i Gjirokastrës dhe i Beratit.
Homazhet në nderim të studiuesit do të zhvillohen sot në ambientet e agjencisë funerale Alba 2000, pranë Medresesë, ndërsa ceremonia e përcjelljes për në banesën e fundit do të mbahet në orën 16:00, në varrezat e Tufinës.
Postimi i plotë:
Ndahet nga jeta akademik Emin Riza, studiuesi i shquar i trashëgimisë kulturore
-Kryesia e Akademisë së Shkencave të Shqipërisë mesazh ngushëllimi për humbjen e akademikut Emin Riza
#AShSh
#AkademikEminRiza
#Nekrologji
Është ndarë nga jeta në moshën 89-vjeçare akademik Emin Riza, një nga studiuesit më të njohur shqiptarë në fushën e trashëgimisë kulturore dhe arkitekturës tradicionale.
Ai lindi më 3 korrik 1937 në Shkodër. Gjatë një karriere të gjatë si studiues, pedagog dhe specialist në Institutin e Monumenteve të Kulturës, akademik Riza dha një kontribut të jashtëzakonshëm në dokumentimin, mbrojtjen dhe promovimin e trashëgimisë materiale shqiptare.
Ndër veprat e tij më të rëndësishme janë “Qyteti–Muze i Gjirokastrës” (1980), një studim themelor mbi trashëgiminë ndërtimore të Gjirokastrës, banesat karakteristike dhe vlerat e saj si qytet-muze, si edhe “Banesa shqiptare me qoshk” (2018), monografi e botuar nga Akademia e Shkencave, e cila trajton tipologjinë e banesave popullore shqiptare me qoshk dhe vlerat e tyre arkitektonike.
Akademik Riza ishte autor i 16 monografive, pesë prej tyre në bashkautorësi, si edhe i 134 artikujve shkencorë të botuar në revista të specializuara, ndër to “Studia Albanica”, “Arkitektura popullore shqiptare” dhe “Monumentet”, ku trajtoi tipologjitë e banesave popullore, strukturat ndërtimore dhe trashëgiminë e qyteteve historike.
Ai ishte gjithashtu kryeredaktor i revistave “Studia Albanica” dhe “Monumentet”, duke nxitur botimin e studimeve mbi trashëgiminë kulturore shqiptare. Akademik Riza ishte nismëtar i Ligjit “Për trashëgiminë kulturore” dhe kryesues i grupit të punës për përgatitjen e dosjeve të Gjirokastrës dhe Beratit për UNESCO-n, çka kontribuoi në përfshirjen e këtyre qyteteve në Listën e Trashëgimisë Botërore.
Për kontributin e tij të jashtëzakonshëm në ruajtjen dhe promovimin e trashëgimisë kulturore shqiptare, akademik Emin Riza u nderua me titullin “Qytetar Nderi” i Gjirokastrës dhe i Beratit, duke lënë një trashëgimi të vyer për studiuesit e rinj dhe për kujtesën kulturore të Shqipërisë.Për kontributin e tij të jashtëzakonshëm në ruajtjen dhe promovimin e trashëgimisë kulturore, akademik Emin Riza u nderua me titullin “Qytetar Nderi” i Gjirokastrës dhe i Beratit.
Akademia e Shkencave e Shqipërisë dhe Komisioni i Përhershëm i Trashëgimisë Kulturore i shprehin familjes, miqve, komunitetit akademik dhe bashkëpunëtorëve ndër vite të akademik Emin Rizës ngushëllimet më të sinqerta për këtë humbje të madhe njerëzore dhe shkencore.
Homazhet do të mbahen sot në ambientet e agjencisë funerale Alba 2000, pranë Medresesë. Ceremonia e përcjelljes për në banesën e fundit do të zhvillohet në orën 16:00, në varrezat e Tufinës.
