Kryeministri pritet të shpallë paketën më të madhe të ndryshimeve që nga ardhja në pushtet. Burime brenda mazhorancës flasin për një kabinet pothuajse të ri, spastrim të drejtuesve të institucioneve dhe një Kongres të Jashtëzakonshëm që do të riformatojë Partinë Socialiste.
Ka dy ditë që në korridoret e mazhorancës kanë nisur të qarkullojnë zëra për një tronditje të madhe politike, të cilën Edi Rama pritet ta shpallë të premten.
Burime të ndryshme flasin për një ribërje të kabinetit qeveritar në masën 90 për qind, ku nga qeveria aktuale pritet të mbeten vetëm katër ministra.
Deri tani, në mënyrë jozyrtare, qarkullon emri i Anila Denaj si kandidat për postin e zv/kryeministrit, ndërsa për pjesën tjetër të kabinetit mungon pothuajse çdo informacion.
Gjasat janë që Rama të mos synojë një riekuilibrim të lobeve brenda Partisë Socialiste, por të sjellë në qeveri figura që vijnë nga shoqëria civile, bota akademike, sektori privat ose diaspora. Në këtë mënyrë ai do të përpiqet ta paraqesë kabinetin si një ekip me profil teknik dhe profesional, ndërsa boshti politik i qeverisë do të mbetet i pandryshuar.
Po ashtu, pritet krijimi i një ose dy portofoleve të reja, të orientuara drejt marrëdhënieve me qytetarët dhe komunitetet, ndërsa pjesa tjetër e kabinetit do të mbështetet mbi strukturën tradicionale të qeverisjes.
Megjithatë, ndryshimet më të thella nuk pritet të ndalen te ministrat. Tërmeti i vërtetë pritet të godasë nivelin e dytë të pushtetit ekzekutiv, drejtuesit e kompanive publike dhe institucioneve me peshë ekonomike, të cilët administrojnë buxhete të mëdha dhe mijëra punonjës. Nga Tatimet deri te institucionet e kulturës flitet për një rinovim pothuajse të plotë. Në të njëjtën kohë, qarkullojnë sinjale se do të ndërhyhet edhe në institucionet që administrojnë kontratat publike, lejet e ndërtimit dhe zhvillimin urban.
Paralelisht me këto lëvizje, Rama pritet të thërrasë një Kongres të Jashtëzakonshëm të Partisë Socialiste. Kongresi do të zgjedhë Asamblenë dhe Kryesinë e re, ndërsa në strukturat drejtuese pritet të promovohen shumë nga deputetët e rinj që, sipas perceptimit brenda partisë, i qëndruan pranë kryeministrit gjatë dy muajve të fundit të tensioneve politike.
Sipas informacioneve që qarkullojnë, në mbledhjen e grupit parlamentar nuk do të jetë Rama ai që do të trajtojë çështjen e deputetëve të konsideruar “inaktivë”. Këtë rol pritet ta marrë Taulant Balla, i cili ka përgatitur një analizë të zgjeruar mbi aktivitetin publik dhe angazhimin politik të deputetëve socialistë.
Vetëm në fund të mbledhjes pritet të ndërhyjë Rama. Burimet thonë se ai nuk do të përdorë një gjuhë përjashtuese ndaj deputetëve që janë konsideruar si “të dyshimtë” ose “të pabindur”, por do të mbajë një qëndrim më të moderuar, me synimin për të shmangur përçarje të reja brenda shumicës.
Në të njëjtën mbledhje, Rama pritet të ndalet edhe te platforma e propozuar nga Elisa Spiropali, duke deklaruar se Partia Socialiste mbetet e hapur për një debat më të gjerë mbi organizimin e saj. Një nga ndryshimet që po diskutohet është që drejtuesit kryesorë institucionalë të shumicës, kryetari i Kuvendit, drejtuesi i grupit parlamentar, kryetarët e komisioneve parlamentare dhe funksione të tjera të rëndësishme, të zgjidhen nga Asambleja Kombëtare me votim të fshehtë.
Këto ndryshime mund të mos materializohen menjëherë. Burimet lënë të kuptohet se Rama mund ta ndajë procesin në dy faza. Faza e parë do të shpallet tani, ndërsa faza e dytë mund të vijë në shtator, pasi të jetë testuar reagimi i opinionit publik dhe i vetë Partisë Socialiste ndaj paketës së parë të “reflektimit”. Nëse mesazhi i parë nuk prodhon efektin e dëshiruar, atëherë paketa e dytë pritet të sjellë lëvizje të tjera, edhe më të thella, në drejtimin politik dhe institucional të mazhorancës./Pamfleti
