Agjencia e Sigurimit të Depozitave (ASD) pritet të plotësojë gjatë këtij muaji strukturën e saj drejtuese ekzekutive. Pas emërimit të Drejtores së Përgjithshme, Mina Kusta, Këshilli Drejtues pritet të vendosë edhe për emërimin e Zëvendësdrejtores së Përgjithshme. Sipas burimeve, në këtë detyrë pritet të zgjidhet juristja Pamela Qirko.
Emri i Qirkos është bërë i njohur për publikun si pjesë e procesit të vettingut, por edhe për lidhjen familjare me zëvendëskryeministren Belinda Balluku, pasi është motra e saj. Ajo është shfaqur gjithashtu publikisht si avokate e Ballukut, pasi kjo e fundit u mor e pandehur nga SPAK.
Pamela Qirko është juriste me profesion dhe gjatë periudhës 2017 deri në 2023 shërbeu fillimisht si anëtare dhe më pas si kryetare e Komisionit të Pavarur të Kualifikimit (KPK), institucioni që drejtoi procesin e rivlerësimit kalimtar të gjyqtarëve dhe prokurorëve. Më herët, karriera e saj është zhvilluar kryesisht në sektorin privat, ku ka punuar për një periudhë të gjatë në Telekom Albania/AMC.
Megjithatë, nga përvoja profesionale e saj nuk rezulton të ketë eksperiencë në sektorin financiar apo në administrimin e skemave të sigurimit të depozitave.
Pak javë më parë, Qirko tentoi të rikthehej në sistemin e drejtësisë duke kandiduar për një vend në Gjykatën e Apelit të Juridiksionit të Përgjithshëm në Tiranë, por kandidatura e saj u rrëzua nga Këshilli i Lartë Gjyqësor.
Sipas statutit të Agjencisë së Sigurimit të Depozitave, Zëvendësdrejtori i Përgjithshëm propozohet nga Drejtori i Përgjithshëm dhe emërohet nga Këshilli Drejtues. Ky organ përbëhet nga pesë anëtarë, ku dy emërohen nga Banka e Shqipërisë, dy nga Ministria e Financave dhe një nga Instituti i Ekspertëve Kontabël të Autorizuar (IEKA).
Emërimi i pritshëm i Qirkos vjen pas emërimit të Mina Kustës në krye të ASD-së, një post që kishte mbetur vakant që prej korrikut 2025, pas përfundimit të mandatit të Genc Mamanit. Kusta ka një eksperiencë të gjatë në Albcontrol, ku ka mbajtur postet e Drejtorit Ekonomik dhe më pas të Drejtorit të Përgjithshëm.
Ndryshimet në drejtimin e Agjencisë së Sigurimit të Depozitave vijnë në një moment të rëndësishëm, pasi institucioni po përgatit reformimin e ligjit organik që do të rrisë ndjeshëm nivelin e sigurimit të depozitave bankare.
Aktualisht, ASD garanton depozitat bankare deri në 2.5 milionë lekë dhe depozitat në shoqëritë e kursim kreditit deri në 2 milionë lekë. Projektligji i ri parashikon që, në një fazë të parë, kufiri i mbulimit të rritet në 6 milionë lekë, ndërsa me anëtarësimin e Shqipërisë në Bashkimin Europian synohet harmonizimi i plotë me direktivën europiane, duke e çuar shumën e garantuar në 100 mijë euro.
Emërimi i pritshëm i Qirkos vjen në një kohë kur motra e saj, Belinda Balluku, vijon të hetohet për akuza që lidhen me korrupsion, abuzim me tenderët publikë dhe favorizim në kontratat e infrastrukturës.
Në këtë kontekst, fakti që Pamela Qirko nuk rezulton të ketë përvojë të mëparshme në sektorin financiar pritet të ngjallë diskutime, veçanërisht në një periudhë kur Agjencia e Sigurimit të Depozitave po përgatitet të zbatojë ndryshime të rëndësishme ligjore që prekin nivelin e mbrojtjes së depozitave të qytetarëve.
