Reforma e re territoriale duket se po sjell pakënaqësi edhe brenda radhëve të Partisë Socialiste, veçanërisht në bashkitë që rrezikojnë të humbasin statusin e tyre. Pas reagimeve në Poliçan dhe dorëheqjes së kreut të PS-së në këtë bashki, Erjon Zylyftari, kundërshtitë zhvendosen në Patos.
Suela Hoxha, anëtare e Këshillit Bashkiak të Patosit nga radhët e PS-së dhe ish-kryetare e degës socialiste në vitet 2022-2024, ka dalë hapur kundër ndarjes së re territoriale. Në një prononcim të kërkuar për Newsbomb.al, Hoxha thotë se Patosi nuk e meriton të humbasë statusin e bashkisë, duke e cilësuar të padrejtë një vendim të tillë.
“Lidhur me Reformën Administrativo-Territoriale, edhe Patosi nuk është dakord. Si qytetare e Patosit, si anëtare aktuale e Këshillit Bashkiak të PS-së në Patos dhe si ish-kryetare e degës së PS-së në Patos (2022-2024), nuk jam dakord me këtë ndarje. Nuk e meriton qyteti i naftëtarëve këtë gjë dhe është e padrejtë”, shprehet ajo.
Këshilltarja socialiste e ka bërë të qartë qëndrimin e saj edhe në Facebook, ku këtë herë thotë se flet përtej bindjeve politike dhe vetëm si qytetare e Patosit.
“Sot po flas vetëm si qytetare e Patosit. Përtej çdo bindjeje politike, nuk jam dakord që Patosi të humbasë statusin e bashkisë. Ky nuk është thjesht një ndryshim administrativ. Është një vendim që prek historinë, identitetin dhe të ardhmen e një qyteti që ka dhënë shumë për Shqipërinë.
Trishtim që zëri i Patosit nuk është dëgjuar. Kam bindjen se qyteti ynë nuk ka pasur përfaqësimin që meriton në tryezat ku merren vendime kaq të rëndësishme.
Humbja e statusit të bashkisë nuk është vetëm çështje emri. Do të thotë më pak vendimmarrje për Patosin, më pak peshë në përfaqësim, rrezik që investimet dhe prioritetet të zhvendosen drejt qendrave më të mëdha dhe që problemet e qytetit tonë të mos marrin vëmendjen që meritojnë. Qytetarët mund të ndihen më larg institucioneve që u shërbejnë dhe zëri i komunitetit të ketë më pak ndikim.
Patosi nuk është një pikë në hartën që ju tregoni. Është historia jonë, identiteti ynë dhe një qytet që meriton të respektohet”, shkruan Hoxha.