Një shpërthim i fuqishëm ka tronditur mbrëmjen e së shtunës një restorant në qendër të Moskës, ku si pasojë kanë humbur jetën tre persona dhe janë plagosur 21 të tjerë.
Sipas autoriteteve ruse, shpërthimi në restorantin “Balzi Rossi”, në sheshin Kudrinskaya, është shkaktuar nga një pajisje shpërthyese artizanale, e cila dyshohet se ishte sjellë në ambientet e lokalit nga një grua.
Komisioni Kombëtar Antiterrorist i Rusisë bëri të ditur se gruaja mbeti e vrarë në shpërthim, ndërsa dy viktimat e tjera janë një roje sigurie, i cili e kishte ndaluar atë në hyrje të restorantit, dhe një klient i lokalit.
Ngjarja ndodhi rreth orës 19:55 sipas kohës lokale, ndërsa në momentin e shpërthimit restoranti ishte i mbyllur për publikun pasi aty po zhvillohej një aktivitet privat.
Sipas mediave ruse, në restorant po zhvillohej një banket privat, ndërsa disa raportime jozyrtare pretendojnë se aktiviteti mund të ishte organizuar në nder të një zyrtari të lartë ushtarak.
Pranë restorantit janë parë disa automjete me targa të zeza, të përdorura zakonisht nga strukturat ushtarake ruse.
Disa kanale në Telegram, të cituara edhe nga Reuters, kanë raportuar se mes të ftuarve mund të ketë qenë edhe Alexander Chaiko, komandant i forcave ajrore ruse, por ky informacion nuk është konfirmuar zyrtarisht nga autoritetet.
Pas shpërthimit, në ambientet e restorantit shpërtheu edhe një zjarr, i cili u klasifikua nga zjarrfikësit si i nivelit të tretë të vështirësisë.
Komiteti Hetimor i Moskës njoftoi se hetimet vijojnë për të përcaktuar rrethanat e plota të ngjarjes, ndërsa po punohet për identifikimin e përgjegjësve dhe zbardhjen e motivit të mundshëm të sulmit.
Numri i të plagosurve ka shkuar në 21 persona, ndërsa disa prej tyre raportohet se ndodhen në gjendje të rëndë.