Shumë drejtues mjetesh kanë zakon të lënë çantën, laptopin apo sende të tjera personale në sediljen e makinës, por ekspertët e sigurisë rrugore paralajmërojnë se kjo mund të ketë pasoja të rënda në rast aksidenti.
Me rritjen e lëvizjeve gjatë sezonit veror, autoritetet po u bëjnë thirrje shoferëve t’i kushtojnë më shumë vëmendje mënyrës se si transportojnë sendet brenda automjetit. Objektet e palidhura në kabinë mund të shndërrohen në rrezik për shoferin dhe pasagjerët në rast frenimi të fortë ose përplasjeje.
Sipas specialistëve, një objekt që qëndron i lirë në sedilje shumëfishon forcën e goditjes gjatë aksidentit. Në një përplasje me rreth 50 kilometra në orë, pesha efektive e tij mund të arrijë deri në 40 herë më shumë se pesha reale. Kjo do të thotë se edhe një çantë e zakonshme mund të godasë me forcë të konsiderueshme, ndërsa një laptop apo telefon celular mund të shkaktojë lëndime serioze.
Për këtë arsye, autoritetet rekomandojnë që sendet personale të vendosen në bagazh ose në hapësirat e posaçme të ruajtjes brenda automjetit. Në disa vende europiane, transportimi i objekteve të pasiguruara mund të shoqërohet edhe me gjoba që arrijnë deri në 200 euro.
Një studim i realizuar nga Volkswagen tregon se pothuajse gjysma e shoferëve udhëtojnë rregullisht me sende të vendosura në sedilje, ndërsa më pak se një e treta i ruajnë ato në vende të sigurta.
Ekspertët këshillojnë gjithashtu që rripat e sigurimit të sediljeve të pasme të mbahen të lidhur edhe kur nuk ka pasagjerë. Kjo ndihmon në mbajtjen më të qëndrueshme të mbështetëseve të sediljeve dhe ul rrezikun që bagazhet të shtyhen drejt kabinës në rast frenimi ose përplasjeje.
Një veprim i thjeshtë, si sigurimi i objekteve para nisjes së udhëtimit, mund të bëjë një ndryshim të rëndësishëm për sigurinë e të gjithë personave në automjet.