Pesë janë emrat që kanë shprehur interes për të garuar për postin e Prokurorit të Përgjithshëm, ndërsa pas përfundimit të afatit të aplikimeve, Këshilli i Lartë i Prokurorisë (KLP) pritet të nisë fazën e verifikimit dhe vlerësimit të kandidatëve.
Deri më 3 gusht, në garë janë regjistruar Fatjona Memçaj, Arta Marku, Rovena Zoto, Adnan Xholi dhe Ylli Pjetërnikaj. Ndërkohë, prokurori Kreshnik Ajazi kishte dorëzuar dokumentet pranë KLP-së, por më pas vendosi të tërhiqej nga gara.
Afati për dorëzimin e kandidaturave u hap më 3 korrik dhe prokurorët kishin 30 ditë kohë për të paraqitur dokumentacionin e nevojshëm, deri në orën 00:00 të 1 gushtit.
Procesi është hapur pasi mandati 7-vjeçar i Prokurorit aktual të Përgjithshëm, Olsian Çela, përfundon në dhjetor të këtij viti. Sipas Kushtetutës, kreu i organit të akuzës zgjidhet për një mandat 7-vjeçar, pa të drejtë rikandidimi.
Ndër kandidatët që kanë hyrë në garë është edhe prokurori i SPAK, Adnan Xholi, i cili më 29 korrik u bë personi i parë që dorëzoi dokumentacionin për të kandiduar.
Një ditë më pas, më 30 korrik, në garë u fut edhe prokurorja Rovena Zoto. Aktualisht ajo ushtron detyrën pranë Prokurorisë së Tiranës dhe është emëruar prokurore në vitin 2010, pas përfundimit të Shkollës së Magjistraturës. Gjatë karrierës së saj ka shërbyer në Prokuroritë e Lushnjës, Fierit dhe Tiranës, ku ka trajtuar kryesisht çështje të pastrimit të parave, financimit të terrorizmit, krimeve financiare dhe hetimeve pasurore.
Po më 30 korrik, dokumentacionin pranë KLP-së e dorëzoi edhe Ylli Pjetërnikaj, duke u bërë kandidati i tretë që hyri në garë. Pjetërnikaj ka një karrierë të gjatë në sistemin e drejtësisë dhe aktualisht është edhe pedagog në Shkollën e Magjistraturës. Ai mban gradën akademike “Doktor i Shkencave” në fushën e së drejtës dhe ka shërbyer si prokuror në Kukës, Lezhë, Tiranë dhe Shkodër, ku ka mbajtur edhe funksione drejtuese.
Pas mbylljes së fazës së aplikimeve, KLP do të verifikojë dokumentacionin dhe përmbushjen e kritereve ligjore nga kandidatët. Këshilli ka afat deri më 14 gusht për këtë procedurë, përpara se të vijojë me vlerësimin dhe renditjen e kandidatëve.
Sipas procedurës kushtetuese, KLP duhet t’i propozojë Kuvendit tre kandidatë, ndërsa Prokurori i ri i Përgjithshëm zgjidhet nga parlamenti me shumicën e kërkuar prej tre të pestave të votave.
Berisha refuzon bashkëpunimin me PS-në, rrezikohet vendimmarrja nga KLP
Në prag të procesit të zgjedhjes së pasuesit të Olsian Çelës, kreu i Partisë Demokratike, Sali Berisha, ka deklaruar se opozita nuk do të bashkëpunojë me Partinë Socialiste për përzgjedhjen e emrave për institucionet kushtetuese.
Ky qëndrim politik mund të ketë pasoja direkte në procesin e zgjedhjes së Prokurorit të Përgjithshëm. Kushtetuta parashikon se kreu i organit të akuzës zgjidhet nga Kuvendi me tre të pestat e votave, mbi bazën e listës së kandidatëve të propozuar nga KLP.
Në rast se brenda afatit kushtetues nuk arrihet shumica e nevojshme në Kuvend, mekanizmi ligjor parashikon që të emërohet automatikisht kandidati i renditur i pari nga KLP.
Kjo do të thotë se mungesa e një konsensusi politik mes mazhorancës dhe opozitës mund ta zhvendosë peshën kryesore të vendimmarrjes te Këshilli i Lartë i Prokurorisë, duke i dhënë këtij institucioni një rol përcaktues në zgjedhjen e drejtuesit të ardhshëm të Prokurorisë së Përgjithshme.
Në këtë mënyrë, refuzimi i bashkëpunimit nga ana e opozitës nuk do të ndikojë vetëm në marrëdhëniet politike mes palëve, por mund të ndryshojë edhe balancën institucionale në procesin e përzgjedhjes së Prokurorit të ri të Përgjithshëm.Dalin emrat e BUJSHEM – Kush jane pese kandidatet per kreun e prokurorise dhe cili eshte me i favorizuari