Sot, më 10 gusht 2026, mbushen 8 vite nga masakra e Selenicës, një prej ngjarjeve më të rënda kriminale që tronditi vendin. Më 10 gusht 2018, Ritvan Zykaj vrau me armë zjarri 8 persona të farefisit të tij në Selenicë të Vlorës, pas një konflikti familjar të lidhur me akuzat për vjedhjen e disa pulave të detit.
Viktimat ishin Demir Zykaj, Perri Zykaj, Azem Zykaj, Aferdita Zykaj, Besim Zykaj, Vasilika Zykaj, Sara Zykaj dhe Ledion Zyka. Ngjarja ndodhi pas një dreke familjare, ndërsa gjatë hetimit në vendin e krimit u gjetën dhe u sekuestruan si prova materiale 14 gëzhoja të qitura nga një armë zjarri e kalibrit 7.62 mm.
Sipas dinamikës së zbardhur të ngjarjes, atë ditë familjarët ishin mbledhur për drekë në banesën e Kujtim Zykajt. Gjatë orëve të para të pasdites, Ritvan Zykaj ishte larguar nga banesa ku po zhvillohej dreka, ndërsa pak më vonë familjarët dëgjuan krisma armësh nga drejtimi i banesës së Sadik Zykajt.
Pak minuta pas të shtënave, një prej të afërmve mori në telefon një video të dërguar nga Ritvani, ku shfaqeshin persona të shtrirë në tokë në oborrin e banesës së Demir Zykajt. Më pas, familjarët mësuan se viktimat ishin qëlluar me armë zjarri. Ritvan Zykaj u arrestua pas ngjarjes dhe gjatë marrjes në pyetje pranoi autorësinë, duke shpjeguar edhe mekanizmin e krimit.
Një vit më pas, në vitin 2019, Gjykata e Vlorës e dënoi Ritvan Zykajn me burgim të përjetshëm, dënim që ishte kërkuar edhe nga prokuroria. Krimi, i kryer për ato që hetimi i cilësoi si “motive të dobëta”, mbeti gjatë në kujtesën e opinionit publik për brutalitetin e tij dhe faktin se viktimat ishin pjesëtarë të së njëjtës familje.
Tetë vite më pas, emrat e Demir, Perri, Azem, Aferdita, Besim, Vasilika, Sara dhe Ledion Zykajt rikthehen në kujtesë në përvjetorin e masakrës që i mori jetën 8 anëtarëve të një familjeje në vetëm pak minuta.
