Avokati i njohur, Spartak Ngjela ka reaguar në rrjetet sociale, ku ka bërë një deklaratë të fortë në lidhje me zhvillimet politike në Shqipëri dhe rolin e Edi Ramës. Z. Ngjela pretendon se Shqipëria po ndikohet nga Beogradi, Athina dhe Parisi, ndërsa shprehet se kryeministri Edi Rama po bashkëpunon me këto qarqe. Ai thekson se Shqipëria mbetet një vend i fortë dhe se marrëdhëniet me Shtetet e Bashkuara të Amerikës janë një faktor i rëndësishëm për pozicionin e vendit në rajon.
Në reagimin e tij, Ngjela ngre gjithashtu pikëpyetje mbi të ardhmen politike të kryeministrit Rama. “Po kryeministri Edi Rama? Prisni dhe shikoni…”, shkruan Ngjela, duke lënë të nënkuptohet se sipas tij, kryeministri Edi Rama është “poli agjent” se atë e pret një zhvillim i rëndësishëm politik (fund i hidhur).
“Pse lodheni? Shqipërinë sot po e drejton Beogradi, Athina dhe Parisi…. kundërshtarët historikë të Shqipërisë, dhe brenda tyre, me armiqësinë e tyre, ushqehet sot edhe Edi Rama, se me ata po punon. Kjo është gjendja. Por Shqipëria ka qenë në shekuj e shekuj e fortë. Asgjë nuk i bëjnë dot. Edhe sot, ne jemi shume të fortë, sepse jemi aleati kryesor i Shteteve të Bashkuara të Amerikës në Gadishullin tonë Ilirik. Po kryeministri Edi Rama? Prisni dhe shikoni…”, shkruan Ngjela.
Po ashtu, avokat Spartak Ngjela ka reaguar sërish në rrjetet sociale, ku ka komentuar çështjet kombëtare shqiptare dhe zhvillimet që lidhen me Kosovën e Çamërinë. Në deklaratën e tij, Ngjela e cilëson Kosovën si “një shtet të dytë shqiptar” dhe shprehet se edhe Çamëria është futur në një “udhë të mbarë kombëtare”. “Një shtet të dyte shqiptar: e morëm.- Kosovën. Dhe kjo i ka çmendur pushtuesit tanë. Por ka hyrë në udhë të mbarë kombëtare edhe Çamëria. Edhe kjo është një çështje kombëtare e sigurt….”, shprehet ai.
Ngjela: Shqipërisë i duhet ndryshimi
Ndërkohë më herët, avokat Spartak Ngjela ka publikuar edhe një analizë të gjatë mbi zhvillimet politike dhe historike në Shqipëri, duke u ndalur te diktatura, tranzicioni dhe drejtimi i vendit në ditët e sotme. Në shkrimin e tij, ai e konsideron Shqipërinë një vend ku “koha ka ngrirë” dhe ngre pikëpyetje të forta mbi klasën politike dhe mungesën e zhvillimit.
Ngjela kritikon ashpër kryeministrin Edi Rama, duke deklaruar se me të Shqipëria nuk ka të ardhme dhe duke e lidhur këtë me atë që ai e cilëson si mungesë të kulturës politike dhe historike. Në fund, ai ndalet te lëvizja studentore dhe protesta kundër qeverisë, duke e cilësuar atë si një zhvillim të rëndësishëm në skenën politike shqiptare.
“Kur ngrin historia e një kombi apo e një shteti? Ajo histori quhet e ngrirë kur në një komb nuk ka zhvillim. Por… Kur ky komb drejtohet nga individë, te cilët, për faktin që nuk dinë të bëjnë asgjë, mbahen me tiraninë e tyre si sulltanë, domethënë ́si një lloj monarku apo mbreti, që vret për pushtetin e tij dhe prandaj, të gjithë popullin apo shoqërinë që po drejton, ai e dëshiron që ajo të jetë e trembur.
Dhe ka pasur edhe një shprehje filozofiko – politike, e cila ka thënë: Kalli frikën një populli, dhe do shohësh se me këtë popull do të bësh çudira. Dhe po ta shohësh historinë e diktaturës Hoxha në Shqipëri, ajo në këtë rrugë ka ecur: frikë, punë, skllavëri dhe zhvillim; por gjithçka me një emër: Enver Hoxha. Dhe populli bërtiste për Enver Hoxhën deri në çmenduri, por ne ende nuk e kemi një studim psikologjiko – historik për figurën e Enver Hoxhës, dhe për diktaturën Hoxha në Shqipëri. Por duhet thënë se… Në këtë histori ka shumë enigma, të cilat përplasen me njëra – tjetrën. Dhe këto janë : Komunizmi e mori Shqipërinë me një popullsi prej 850000 banorësh ne vitin 1945, dhe e la me 4 milionë banore në vitin 1992; E mori Shqipërinë pa fare fabrika dhe e la me 500 uzina dhe fabrika, industriale që u shkatërrua nga pseudo-progresi Berisha në vitet 1992 – 1996. Turp dhe një krim historik ky! Po se mos ka qenë vetëm ky!
Dhe prandaj koha tani ka ngrirë në Shqipëri. Po si do ta gjëje rrugën e shkrirjes zhvilluese kjo kohë? E vetmja shpresë jane 800 mije shqiptarët që po punojnë në Evropë dhe po mbajnë familjet e tyre me paratë që ata dërgojnë; por dhe vetë Shqipërinë dhe shtetin e saj ata po e mbajnë. Po sot si e kemi të ardhmen? Me kryeministrin Rama nuk kemi të ardhme, sepse: Duke pasur një kulturë shumë të dobët politiko – historike, Rama kishte të ndërtuar një kompleks psikik, i cili i thoshte se ai, brenda historisë së Shqipërisë, nuk mund të gjente dot të ardhme.
Kurse të ardhmen Edi Ramës ia dhuroi Ilir Meta i cili e ndihmoi te zgjidhej si kryetar i Bashkisë së Tiranës dhe si kryeministër. Ende nuk dihen arsyet pse, por kjo ka ndodhur dhe tani ky është një fakt historik.
Prandaj na duhet të theksojmë se në Shqipëri ende nuk po ka një klasë drejtuese politike e cila të jetë me Shqipërinë. Po koha, kështu do të na lerë gjithmone ne shqiptarëve: me kryeministra të cilët nuk kanë fare lidhje me Shqipërinë? Të shohim, se tani në Tiranë koha erdhi dhe nxori në pahun historik të kohës lëvizjen e fuqishme studentore, në një protestë energjike kundër kryeministrit aktual dhe vetë qeverisë së tij”, nënvizon avokat Spartak Ngjela.
