Një lajm i trishtë ka ardhur nga bota e mjekësisë në vendin tonë, ku është ndarë nga jeta, në moshën 97-vjeçare, Qemal Poçi. Ai mbante titullin Doktor i Shkencave Veterinare dhe një prej figurave të rëndësishme të zhvillimit të Toksikologjisë Veterinare në vendin tonë.
Lajmi është bërë i ditur nga Urdhri i Mjekut Veterinar, i cili ka shprehur ngushëllimet për familjarët, kolegët dhe brezat e mjekëve veterinerë që u formuan nën ndikimin e tij. Poçi ishte diplomuar me Diplomë të Artë në Akademinë Veterinare të Moskës dhe ishte specializuar në fushën e toksikologjisë ushtarake. Për më shumë se tri dekada, ai i shërbeu veterinarisë shqiptare, si në strukturat ushtarake ashtu edhe në ato civile.
Gjatë karrierës së tij, ai punoi në Spitalin Qendror Veterinar, në ekonomitë më të mëdha bujqësore të vendit dhe në Institutin e Kërkimeve Veterinare. Një pjesë të rëndësishme të veprimtarisë së tij ia kushtoi edhe mësimdhënies në Fakultetin e Mjekësisë Veterinare.
Ceremonia e përcjelljes së fundit do të zhvillohet më 16 gusht, në orën 11:00, në Qendrën Funerale “Alba”, në Rrugën e Durrësit, Tiranë.
Njoftimi i Urdhrit të Mjekut Veterinar:
Me hidhërim të thellë njoftojmë komunitetin veterinar shqiptar se dje, më 14 gusht, u nda nga jeta, në moshën 97-vjeçare, Dr. Qemal Poçi, Doktor i Shkencave Veterinare dhe një ndër themeluesit e Toksikologjisë Veterinare në vendin tonë.
I diplomuar me diplomë të Artë në Akademinë Veterinare të Moskës dhe i specializuar në fushën e toksikologjisë ushtarake, Dr. Poçi i kushtoi mbi tri dekada pune shërbimit veterinar ushtarak e civil, Spitalit Qendror Veterinar, ekonomive më të mëdha bujqësore të vendit, Institutit të Kërkimeve Veterinare dhe mësimdhënies në Fakultetin e Mjekësisë Veterinare.
Puna e tij kërkimore, parandaluese dhe klinike në mbrojtjen e shëndetit të njerëzve e të kafshëve nga helmimet dhe nga armët e dëmtimit në masë, si dhe kontributi i tij në formimin e brezave të mjekëve veterinerë, mbeten pjesë e pashlyeshme e historisë së profesionit tonë.
Ceremonia e përcjelljes së fundit do të zhvillohet nesër, më 16 gusht, në orën 11:00, në Qendra Funerale “Alba”, Rruga e Durrësit, Tiranë.
Ngushëllime të sinqerta familjes, të afërmve, kolegëve dhe nxënësve të tij.
Qoftë kujtimi i tij i përjetshëm!
