Janë zbardhur detaje të reja nga aksidenti tragjik në Athinë, ku humbën jetën tre të rinj nga Fieri. Ngjarja e rëndë ndodhi në orët e para të mëngjesit të së enjtes në zonën e Glyfadës, ndërsa autoritetet greke vijojnë hetimet për të përcaktuar dinamikën e plotë të përplasjes.
Sipas raportimeve të mediave greke, rreth orës 02:00, automjeti me pesë të rinjtë brenda ka dalë nga rruga në kryqëzimin e bulevardit Poseidonos me rrugën Kalypsous dhe është përplasur me murin rrethues të një hoteli.
Tre prej të rinjve nuk mundën t’u mbijetonin plagëve të marra, ndërsa dy të tjerë, të dy 18 vjeç, u transportuan në spital. Njëri prej tyre raportohet se është jashtë rrezikut për jetën.
Në fokusin e hetuesve janë edhe momentet para përplasjes. Sipas televizionit grek MEGA, një nga pistat që po shqyrtohet është mundësia që të rinjtë të kenë qenë duke lëvizur me shpejtësi të lartë dhe të kenë garuar me një automjet tjetër.
Policia po verifikon gjithashtu dyshimet se të rinjtë mund të kenë qenë duke regjistruar një video për TikTok në momentin e aksidentit. Hetuesit nuk përjashtojnë mundësinë që në një prej telefonave të jetë regjistruar edhe momenti i përplasjes.
Megjithatë, deri tani nuk është gjetur asnjë provë që konfirmon përfshirjen e një automjeti të dytë. Për këtë arsye, pista e garës së shpejtësisë mbetet ende nën hetim dhe nuk është konfirmuar zyrtarisht.
Autoritetet greke po analizojnë pamjet e kamerave të sigurisë në zonën e aksidentit, ndërsa po mblidhen edhe dëshmi nga persona që mund të kenë qenë pranë vendit të ngjarjes.
Comments are closed.