Policia greke ka zbardhur një ngjarje të rëndë të ndodhur në janar të vitit 2025 në Selanik, ku 32-vjeçari Danjel Dushku dyshohet se u përball me një atentat me armë zjarri.
Oficerët e Nëndrejtorisë Kundër Krimit të Organizuar të Greqisë Veriore kanë arrestuar tre shtetas shqiptarë, të dyshuar për përfshirje në tentativën e vrasjes.
Operacioni u zhvillua në orët e mëngjesit të së mërkurës, në bazë të urdhër-arresteve të lëshuara nga autoritetet greke.
Të arrestuarit janë Robert Elezaj, 33 vjeç, Sergo Elezaj, 31 vjeç dhe Rueldi Dragjoshi, 26 vjeç.
Në të njëjtën kohë, Danjel Dushku, 32 vjeç, është shpallur në kërkim nga autoritetet greke.
Sipas policisë, ngjarja ka ndodhur në mbrëmjen e 8 janarit 2025, kur tre të dyshuarit iu afruan Dushkut në një zonë të Selanikut dhe dyshohet se hapën zjarr ndaj tij.
Policia greke thotë se 33-vjeçari Robert Elezaj, duke përdorur një pistoletë, qëlloi drejt Dushkut, por nuk arriti ta plagoste.
Nga të shtënat mbeti i plagosur një person që ndodhej pranë tij, ndërsa u shkaktuan dëme edhe në një dyqan në zonë.
Edhe 26-vjeçari Rueldi Dragjoshi dyshohet se ka qëlluar me armë drejt Dushkut, pa e prekur atë.
Ndërkohë, sipas hetimeve të autoriteteve greke, 31-vjeçari Sergo Elezaj dyshohet se i ka drejtuar armën Dushkut. Policia thotë se nuk është bërë e mundur të përcaktohet nëse ai ka qëlluar me armë, ndërsa dyshohet se ka ndihmuar dy të arrestuarit e tjerë para dhe gjatë kryerjes së ngjarjes.
Sipas policisë, Sergo Elezaj i ka transportuar dy personat e tjerë drejt vendit të ngjarjes me një automjet me qira dhe ka qëndruar me ta deri në momentin e largimit.
Nga ana tjetër, sipas autoriteteve greke, edhe 32-vjeçari Danjel Dushku ka përdorur armë zjarri gjatë përplasjes, duke qëlluar në drejtim të personave të arrestuar. Të shtënat e tij nuk kanë shkaktuar të plagosur, por kanë dëmtuar automjetin me të cilin kishin mbërritur të dyshuarit, si dhe një tjetër makinë të parkuar.
Policia greke vijon hetimet për zbardhjen e plotë të rrethanave dhe përcaktimin e përgjegjësisë së secilit prej personave të përfshirë në ngjarje.
Comments are closed.