Futbolli turk është tronditur nga ndarja e parakohshme nga jeta e Tolga Kalender. Mbrojtësi i Bandırmaspor ka ndërruar jetë në moshën vetëm 25-vjeçare. Lajmi u bë i ditur të mërkurën nga klubi ku ai luante që prej vitit të kaluar. Shkaku i saktë i vdekjes nuk është bërë i ditur zyrtarisht.
Në mesazhin e lamtumirës, Bandırmaspor shprehu dhimbjen për humbjen e futbollistit të tij dhe u përcolli ngushëllime familjarëve, të afërmve, shokëve të skuadrës dhe tifozëve. “Dhimbja jonë është e madhe, humbja jonë është e papërshkrueshme”, shkroi klubi, duke e cilësuar Kalender një pjesëtar të çmuar të skuadrës.
Ngushëllimeve iu bashkua edhe Federata Turke e Futbollit. Sipas federatës, Kalender e nisi futbollin te Kuvayi Milliyespor dhe gjatë karrierës ishte pjesë edhe e Beykoz Anadolu Spor, İstanbul Başakşehir, Adana Demirspor, Bayrampaşa Spor dhe Diyarbekir Spor. Në vitin e fundit ai mbante veshur fanellën e Bandırmaspor, skuadër që garon në kategorinë e dytë të futbollit turk.
Edhe ish-klubi i tij, Adana Demirspor, publikoi një mesazh ngushëllimi, duke kujtuar përkushtimin dhe kontributin e mbrojtësit gjatë kohës që ishte pjesë e skuadrës. Mesazhe të shumta kanë ardhur gjithashtu nga klube dhe tifozë të futbollit turk, të cilët janë solidarizuar me familjen dhe Bandırmasporin në këtë moment të vështirë.
Ndarja nga jeta e një futbollisti kaq të ri ka lënë një boshllëk të madh te njerëzit që e kanë njohur dhe kanë luajtur përkrah tij. Në këtë ditë zie, vëmendja është te familja e Kalender dhe te të gjithë ata që po përballen me humbjen e tij.
Comments are closed.