Pas shkarkimit nga detyra dhe vendosjes së saj nën masën “arrest në shtëpi”, një tjetër detaj ka tërhequr vëmendjen rreth ish-drejtoreshës së Shërbimit Informativ të Shtetit, Vlora Hyseni.
Emri i saj është zhdukur nga faqja zyrtare e SHISH-it. Në historikun e institucionit nuk shfaqet më as emri dhe as fotografia e ish-drejtoreshës, e cila deri pak ditë më parë qëndronte në krye të një prej strukturave më të rëndësishme të sigurisë kombëtare në Shqipëri.
Ndryshimi vjen pas skandalit që “shpërtheu” disa ditë më parë, ku SPAK kërkoi masën e sigurisë “arrest në shtëpi” për Hysenin, e cila akuzohet se ka nxjerrë sekrete hetimore dhe ka ndihmuar biznesmenin Ergys Agasi si para po ashtu dhe gjatë periudhës kur ishte shpallur në kërkim nga drejtësia shqiptare. Po ashtu, ajo u pezullua nga detyra ndërsa ndaj saj u ngritën dyshime për akuzat “përkrahje të autorit të krimit” dhe “zbulim të akteve ose të dhënave sekrete”.
Vlora Hyseni mori drejtimin e SHISH-it në prill të vitit 2023, duke u bërë gruaja që do të drejtonte institucionin përgjegjës për informacionin dhe sigurinë kombëtare të vendit. Më herët, ajo kishte ndërtuar karrierën e saj në strukturat e inteligjencës së Kosovës dhe kishte shërbyer edhe si këshilltare për sigurinë kombëtare pranë kryeministrit Edi Rama.
Faqja e SHISH
Për më shumë se tre vite, emri i saj ishte pjesë e identitetit institucional të SHISH-it. Sot, pas shkarkimit dhe zhvillimeve të bujshme që e vunë në qendër të hetimeve, ai emër nuk gjendet më në historikun zyrtar të institucionit.
Fshirja e profilit të saj nga faqja e SHISH-it merr kështu një tjetër peshë, pikërisht për shkak të momentit në të cilin ka ndodhur. Institucioni nuk ka dhënë, të paktën publikisht, një shpjegim të nëse bëhet fjalë për një përditësim të faqes pas ndryshimit të drejtimit apo për një vendim të lidhur me situatën e krijuar rreth ish-drejtoreshës.
Kështu pas largimit nga drejtimi i SHISH-it, Vlora Hyseni tashmë duket se është larguar edhe nga “fotografia” zyrtare e institucionit.
Comments are closed.