Një vrasje e rëndë ka tronditur qytetin e Plovdivit në Bullgari, ku biznesmeni i njohur Ilian Filipov është qëlluar për vdekje me armë zjarri. Sipas të dhënave paraprake, ai është qëlluar në kokë dhe ka humbur jetën në vend.
Ministria e Brendshme e Bullgarisë bëri të ditur se rreth orës 01:00 autoritetet morën një telefonatë për një person të plagosur me armë zjarri në një zonë të Plovdivit. Forcat e policisë që mbërritën në vendngjarje konstatuan se Filipov kishte ndërruar jetë.
Menjëherë pas ngjarjes kanë nisur hetimet për të përcaktuar dinamikën dhe motivin e vrasjes, si dhe për identifikimin e autorit apo autorëve. Deri më tani, autoritetet bullgare nuk kanë dhënë informacion zyrtar për persona të dyshuar apo për shkaqet që mund të kenë çuar në vrasjen e biznesmenit.
Ilian Filipov ishte një emër i njohur në botën e biznesit në Bullgari. Ai ishte themelues dhe drejtor ekzekutiv i PIMK, kompania më e madhe e transportit në vend dhe një prej kompanive të mëdha të këtij sektori në Evropë.
Filipov njihej gjithashtu për lidhjen e tij me futbollin. Ai kishte drejtuar si president klubin Botev Plovdiv, ndërsa emri i tij ishte lidhur edhe me projektin për rindërtimin e stadiumit “Hristo Botev”.
Pas lajmit për vdekjen e tij, Botev Plovdiv reagoi në rrjetet sociale, duke vlerësuar kontributin që Filipov kishte dhënë për klubin.
“Ilian Filipov do të mbetet përgjithmonë pjesë e historisë së Botev Plovdiv. Kontributi i tij në shpëtimin e klubit dhe përkushtimi ndaj idesë ‘verdhezi’ do të mbeten të paharrueshme”, thuhet në deklaratën e klubit.
Mesazhi përfundon me fjalët: “Përulemi para kujtimit të tij”.
Hetimet për vrasjen vijojnë, ndërsa motivi dhe autorët mbeten ende të paqartë.
Comments are closed.