“Të ruajmë nervat për të hënën”, dalin MESAZHET, si xhaxhai e nipi planifikuan

Vr asja e gjyqtarit të Apelit të Tiranës, Astrit Kalaja, e ndodhur më 6 tetor 2025 brenda sallës së gjyqit, dyshohet se ishte planifikuar disa ditë përpara ngjarjes. Në këtë përfundim kanë arritur prokurorët pas analizimit të telefonave të sekuestruar të Elvis Shkambit dhe xhaxhait të tij, Gjon Shkambi, ku ekspertët e laboratorit kibernetik pranë SPAK kanë gjetur komunikime që po shqyrtohen si prova në dosjen penale.

Sipas të dhënave të bëra publike nga gazetari Elton Qyno, në një mesazh të datës 2 tetor 2025, Elvis Shkambi i shkruante xhaxhait të tij shprehjen: “…e me i qelbanikos krejt…”.

Komunikimet vijojnë edhe një ditë më pas. Mbrëmjen e 3 tetorit, në orën 22:56, Shkambi i dërgoi një tjetër mesazh Gjon Shkambit, ku shkruante: “…situata asht e randë boll, pa e randu edhe pak ma shumë…”. Vetëm dy minuta më vonë, ai i dërgoi një tjetër mesazh, me fjalët: “…të ruajmë nervat për të Hanën…”.

Data e përmendur në këtë komunikim ishte e hëna, 6 tetor, dita kur gjyqtari Astrit Kalaja u qëllua për vdekje në ambientet e Gjykatës së Apelit. Sipas dosjes, ai u godit me tre plumba pistolete, të cilët rezultuan tejshkues dhe i shkaktuan vdekjen e menjëhershme.

Bazuar në komunikimet e gjetura në telefon, prokurorët Arenc Çela dhe Ridvan Suka kanë arritur në përfundimin se krimi mund të jetë planifikuar të paktën katër ditë më parë. Për Elvis Shkambin janë ngritur akuzat për “Vrasjen e funksionarëve publikë”, për vrasjen e gjyqtarit Kalaja, “Vrasjen në rrethana të tjera cilësuese”, në dëm të Ragip Kurtajt dhe Ervis Kurtajt, të kryer në bashkëpunim, si dhe për “Mbajtjen pa leje të armëve dhe municioneve”.

Nëse shpallet fajtor për këto akuza, Shkambi rrezikon një dënim që, sipas raportimit, mund të shkojë nga 35 vjet burg deri në burgim të përjetshëm. Hetuesit nuk kanë konstatuar përfshirjen e Gjon Shkambit në vrasje.

Në të njëjtën çështje është marrë i pandehur edhe Banush Koxhaj, punonjës i Gjykatës së Apelit të Tiranës, i akuzuar për “Shpërdorim detyre”, pasi nuk kreu kontrollin fizik pas sinjalit të kuq të skanerit të sigurisë.“Të ruajmë nervat për të hënën”, dalin MESAZHET, si xhaxhai e nipi planifikuan V.R.A.S.J.E.N e gjyqtarit Astrit Kalaja: Me i qelbanikos krejt…