Italia do të hapë procedurat për pranimin e mbi 165 mijë punonjësve të huaj për vitin 2027, duke krijuar mundësi të reja punësimi edhe për shtetasit shqiptarë.
Ministria italiane e Punës ka publikuar udhëzimet për zbatimin e dekretit të flukseve migratore, sipas të cilit nga data 23 tetor deri më 7 dhjetor 2026, punëdhënësit në Itali do të mund të përgatisin elektronikisht kërkesat për punësimin e shtetasve nga vendet jashtë Bashkimit Europian.
Në total, për vitin e ardhshëm janë përcaktuar 165 mijë e 850 kuota hyrjeje për motive pune. Pjesën më të madhe e zënë punonjësit sezonalë, me 89 mijë kuota, kryesisht në bujqësi dhe turizëm.
Ndërkohë, 76 mijë e 200 kuota janë parashikuar për punësimin josezonal, në sektorë si ndërtimi, industria, tregtia, transporti, logjistika dhe shërbimet. Brenda kësaj kategorie, 14 mijë vende janë rezervuar për punonjësit e kujdesit dhe asistencës familjare. Për të vetëpunësuarit janë përcaktuar 650 kuota.
Shqipëria dhe Kosova janë në listën e vendeve, shtetasit e të cilave mund të përfitojnë nga këto procedura. Për punësimin josezonal, Italia ka rezervuar 25 mijë kuota për një grup vendesh ku përfshihet edhe Shqipëria, por pa përcaktuar një numër të veçantë vetëm për shtetasit shqiptarë.
Procesi do të zhvillohet në dy faza. Fillimisht, nga 23 tetori, punëdhënësit do të paraplotësojnë kërkesat në portalin e Ministrisë së Brendshme italiane. Dërgimi përfundimtar i tyre do të nisë më 12 janar 2027 për bujqësinë, më 9 shkurt për turizmin, më 16 shkurt për punësimin josezonal dhe më 18 shkurt për asistencën familjare.
Aplikimet kryhen nga punëdhënësit në Itali dhe i nënshtrohen procedurave të autorizimit për punë dhe pajisjes me vizë.
Kuotat janë pjesë e programit trevjeçar italian për emigracionin e ligjshëm, i cili parashikon 497 mijë e 550 hyrje për motive pune gjatë periudhës 2026–2028.
Shifrat përfaqësojnë numrin maksimal të hyrjeve të planifikuara dhe jo kontrata pune tashmë të nënshkruara. /scan.tv
Comments are closed.