Automjeti Mercedes Benz GLE në pronësi të bashkëshortes së avokatit Idajet Beqiri, gjithashtu edhe ajo mbrojtëse ligjore, Nexhi Beqiri, ka shpërthyer mëngjesin e kësaj të marte në oborrin e pallatit ku çifti banon.
Fatmirësisht, mjeti ishte i parkuar dhe avokati Idajet Beqiri që e përdorte shpesh, ndodhej jashtë vendit, ndaj nga shpërthimi nuk ka persona të lënduar por vetëm dëme materiale.
“Rreth orës 09:15, në rrugën “Nikolla Lena”, para një pallati, ka shpërthyer një sasi lënde e dyshuar plasëse, e vendosur në automjetin e parkuar në pronësi të shtetases N. B. Si pasojë, janë shkaktuar vetëm dëme materiale”, njoftoi Policia e Tiranës.
Ngjarja ndodhi në zonën e “Myslym Shyrit” dhe shumë pranë Gjykatës Civile të kryeqytetit. Grupi hetimor po heton për zbardhjen e rrethanave të rastit, si dhe për identifikimin dhe kapjen e autorit, pasi dyshimet janë se shpërthimi ka qenë i telekomanduar.
Kthimi i avokatit nga Brukseli dhe shpërthimi pak minuta para
Avokati Idajet Beqiri ndodhej në Bruksel dhe do të kthehej në Tiranë mbrëmjen e djeshme, por fluturimi është anuluar dhe avioni nuk është nisur. Ai ka qëndruar atje dhe ka zbritur në Rinas rreth 15-20 minuta pasi kishte ndodhur shpërthimi në makinë.
Pamje nga lart, makina e shkaterruar nga shperthimi
Nuk dihet nëse është një rastësi shpërthimi në atë orë, apo autorët e vendosjes së tritolit në makinë nuk kanë pasur dijeni për anulimin e fluturimit të Idajet Beqirit dhe kanë menduar se ai ka arritur në shtëpi në mbrëmje e sot do të përdorte automjetin.
Pritet që grupi hetimor të zbardhë këtë ngjarje të rëndë dhe të sqarojë nëse kemi të bëjmë thjesht me një mesazh për familjen Beqiri, apo synimi ka qenë i mëtejshëm. Nga këqyrja e mjetit, bie në sy se lënda plasëse është vendosur në qendër sediljeve të para, as në motor dhe as në pjesën e pasme, por në zonën ku ulet shoferi dhe pasagjeri i parë.
Comments are closed.