Protesta ka qenë kryefjala e ditëve të fundit. Dhuna, policia dhe Edi Rama kanë dominuar lajmet pothuajse në çdo moment. Por ndërsa vëmendja publike është përqendruar te përplasjet në rrugët e Tiranës, diçka tjetër po zhvillohet larg kamerave, në zyrat e Presidencës së Republikës.
VNA ka mësuar se gjatë dy ditëve të fundit në Presidencë janë zhvilluar takime të ethshme dhe intensive, larg syrit të medias dhe, me sa duket, edhe të qeverisë. Në zyrën e presidentit Bajram Begaj kanë hyrë e dalë ish-presidentë të Republikës, ambasadorë dhe përfaqësues të trupit diplomatik. Mes tyre, ambasadorja e Bashkimit Europian në Tiranë, Sofia Moreira de Sousa, ambasadori gjerman Karl Bergner, si dhe diplomatë të tjerë. Sipas informacioneve të VNA-së, janë zhvilluar takime të veçanta me presidentin Bajram Begaj, por edhe bisedime në tryeza më të ngushta.
Sot, sipas të njëjtave burime, në Presidencë ka qëndruar për më shumë se një orë edhe ambasadori amerikan Eric Wendt.
Nuk dihet ende se kush ka marrë pjesë në të gjitha këto takime, çfarë është diskutuar konkretisht dhe nëse ato janë pjesë e një nisme të koordinuar diplomatike. Ajo që dihet, sipas informacioneve të VNA-së, është se në këto takime nuk ka qenë i pranishëm asnjë përfaqësues i qeverisë. Nuk është e qartë nëse ekzekutivi ka qenë në dijeni të tyre.
Ajo që bie në sy është intensiteti i kontakteve në një moment kur vendi po përjeton ditë të njëpasnjëshme protestash dhe tensionesh politike.
Deri tani nuk ka një komunikim publik që të sqarojë nëse këto lëvizje lidhen drejtpërdrejt me krizën e krijuar nga protestat apo me zhvillime të tjera politike.
Megjithatë, kontrasti është i dukshëm. Ndërsa Kryeministria është rrethuar nga forcat speciale dhe Edi Rama vazhdon përballjen e tij publike me protestuesit, në Presidencë zhvillohen takime që kanë kaluar pothuajse pa vëmendjen e medias.
Çfarë po diskutohet pas dyerve të mbyllura? Përse ky intensitet kontaktesh pikërisht tani dhe çfarë roli mund të marrë institucioni i Presidentit në situatën e krijuar? Mbi të gjitha, çfarë po “gatuajnë” ambasadorët, të cilët, të paktën publikisht, kanë mbajtur një qëndrim relativisht pasiv përballë zhvillimeve të ditëve të fundit, por që tani duket se kanë zgjedhur të flasin më shumë pas dyerve të mbyllura sesa përpara kamerave?
Për momentin, përgjigjet mungojnë. Por ndërsa sytë e të gjithëve janë drejtuar nga Kryeministria, lëvizjet në Presidencë ngrenë një tjetër pyetje: A po kërkohet në rrugë diplomatike një zgjidhje për krizën që politika nuk po arrin ta zgjidhë?
Rama dhunon protestuesit, ambasadorët e BE dhe SHBA mblidhen te Begaj. Çfarë po “gatuhet” larg syve të qeverisë?
