Një lajm i trishtë ka mbërritur pasditen e kësaj të marte pasi mjeku i mirënjohur në Lezhë Xhovalin Leka ka mbyllur sytë përgjithmonë në moshën 63-vjeçare. Lajmi i kobshëm është mësuar nga dhjetëra reagime të bëra nga të afërmit e tij në rrjet, të cilët mes lotësh e kujtojnë doktor Xhovalinin si një profesionist të përkushtuar, i cili për dekada me radhë ia kushtoi jetën mjekësisë, shëndetit dhe shërbimit ndaj njerëzve.
doktor Xhovalinit do i jepet mesditën e nesërme lamtumira e fundit, një ceremoni mortore që do të zhvillohet në varrezat e Shpalit në Mirditë.
U shërbeu për vite me radhë mirditorëve dhe lezhjanëve,
Njoftimi i ceremonisë mortore të mjekut Xhovalin Leka
I lindur më 15 shkurt 1963 në Pshqesh të Kuzhnenit, ai u rrit me vlerat e punës, dijes dhe përkushtimit. Arsimin 8-vjeçar e përfundoi në Shpal, ndërsa shkollën e mesme në gjimnazin “Bardhok Biba” në Rrëshen. Po ashtu, mjeku ndoqi studimet në Fakultetin e Mjekësisë të Universitetit të Tiranës 1983-1989, ku hodhi themelet e një karriere që do ta lidhte për gjithë jetën me shërbimin shëndetësor.
Pas përfundimit të studimeve, nisi rrugën e tij profesionale në qendrën shëndetësore të Spaçit (1989-1990), për të vijuar më pas si përgjegjës i qendrës shëndetësore të Repsit (1990-1992). Në vitin 1993 kreu specializimin pasuniversitar në hematologji, fushë në të cilën do të jepte një kontribut të rëndësishëm.
Në vitet pasuese shërbeu si mjek hematolog në Spitalin e Rrëshenit dhe në Spitalin Rajonal të Lezhës, duke u bërë pjesë e jetës dhe e shqetësimeve të shumë pacientëve e familjeve të tyre.
Përveç përvojës klinike, ai mori përsipër edhe përgjegjësi drejtuese, duke shërbyer si shef i shërbimit spitalor në Mirditë 1994-1996) më pas mjek hematolog në Spitalin Rajonal Lezhë (2000-2002 dhe 2005-2019) në vitin 2013 Dr. Xhovalin Leka ishte drejtor i Spitalit Rajonal të Lezhës.
Nga viti 2019 vijoi kontributin e tij në krye të Qendrës Shëndetësore të Ungrejit.
Pas këtyre viteve pune qëndron një histori e tërë përkushtimi. Qëndrojnë ditë të gjata në shërbim të pacientëve, përgjegjësi të mëdha profesionale dhe përballje me dhimbjen njerëzore.
U shërbeu për vite me radhë mirditorëve dhe lezhjanëve,
Kontributi i Dr. Xhovalin Lekës nuk u kufizua vetëm në detyrat që mbajti. ndër vite ai ka qenë dhe anëtar i Shoqatës Shqiptare të Hematologëve dhe Transfuziologëve, si dhe i Urdhrit të Mjekut. Pjesëmarrja në konferenca kombëtare e ndërkombëtare, përfshirë veprimtari profesionale në Çikago të SHBA-së, dëshmonte përpjekjen e tij për të ndjekur zhvillimet në fushën e hematologjisë dhe në menaxhimin e sistemit shëndetësor.
Ndarja nga jeta e doktor Xhovalinit nuk la pas vetëm dhimbje për familjen dhe njerëzit e tij të dashur, por për të gjithë komunitetin të cilit ai i shërbeu, për kolegët me të cilët ndau përgjegjësitë e profesionit dhe për pacientët që gjetën tek ai një mundësi për t’u përballur me sëmundjen.
