Gazetari Artan Hoxha ka lëshuar akuza të forta ndaj kryeministrit Edi Rama, duke komentuar protestën që po zhvillohet në Tiranë dhe reagimin e qeverisë ndaj qytetarëve që kanë dalë në rrugë. Hoxha hodhi poshtë pretendimet e Ramës se pas protestës fshihen forca të huaja apo grupe ekstremiste.
Sipas gazetarit, kryeministri po përpiqet ta paraqesë revoltën qytetare si një skenar të organizuar nga jashtë, në vend që të përballet me arsyet që i kanë nxjerrë njerëzit në rrugë. Hoxha e bëri të qartë dallimin mes protestave në vende të tjera dhe situatës në Shqipëri, duke deklaruar se këtu kërkesa është shumë më e drejtpërdrejtë: largimi i kryeministrit.
“Atje kanë dalë për kushtet, këtu kanë dalë për të hequr kryeministrin”, u shpreh Hoxha, duke goditur drejtpërdrejt mënyrën se si Rama po e interpreton protestën.
Gazetari komentoi edhe përplasjen mes protestuesve dhe policisë, duke vënë në dukje se palët po ndryshojnë taktikat e tyre. Sipas tij, policia po përqendrohet te identifikimi i protestuesve, ndërsa këta të fundit po përshtatin mënyrën e organizimit për t’iu shmangur identifikimit.
Hoxha kritikoi përdorimin e mjeteve të ujit për shpërndarjen e protestuesve, duke e lidhur këtë me mënyrën se si qeveria shpërndan fondet dhe trajton punonjësit e policisë.
“Qeveria nuk i ka kursyer lekët për këtë gjë. Për rritjen e rrogave të policëve nuk e ka bërë”, deklaroi ai i ftuar në emisionin “Të Paekspozuarit”, duke ngritur pikëpyetje edhe mbi trajtimin e efektivëve që angazhohen në terren.
Në të njëjtën kohë, gazetari tha se protestuesit kanë arritur të marrin vëmendjen publike, pavarësisht përpjekjeve të kryeministrit për të dominuar komunikimin në rrjetet sociale.
“Protestuesit e kanë marrë vëmendjen, e kanë mundur algoritmin e kryeministrit. Reels-et e tyre janë më të ndjekurat”, u shpreh Hoxha.
Ai ironizoi edhe daljet publike të Ramës, duke thënë se kryeministri publikon video, por largohet kur përballet me protestuesit.
“Kryeministri çohet në mëngjes dhe bën video, kur vijnë protestuesit, ia fut vrapit”, tha gazetari, duke shtuar se, sipas tij, Rama po kërkon ta zhvendosë vëmendjen nga kërkesat reale të qytetarëve.
Pedagogët duhej të kishin protestuar më herët: “Janë bashkëvuajtës të sistemit”
Një pjesë e rëndësishme e kritikave të Hoxhës iu drejtua edhe gjendjes së arsimit dhe vonesës së pedagogëve për t’u bashkuar me protestën.
Sipas tij, pedagogët duhet të kishin reaguar shumë më herët, pasi edhe ata janë ndër kategoritë që vuajnë pasojat e sistemit dhe të politikave të ndjekura nga qeveria.
“Daljen e pedagogëve duhet ta kishin bërë më parë. Edhe ata janë bashkëvuajtës të sistemit. Dhomat e konvikteve janë më keq se kur kemi qenë studentë”, deklaroi Hoxha.
Gazetari ngriti pikëpyetje mbi prioritetet e qeverisë në arsim, duke kujtuar se Rama ndodhet në mandatin e katërt dhe se, sipas tij, problemet e studentëve, konvikteve dhe personelit arsimor vazhdojnë të mbeten pa zgjidhje të mjaftueshme.
“Jemi te mandati i katërt: kur do të kthejë kokën nga studentët?”, pyeti ai.
Hoxha kritikoi gjithashtu gjendjen e arsimit parauniversitar dhe mungesën e mësuesve, duke vënë në dukje se pasojat e kësaj situate rëndojnë veçanërisht mbi të rinjtë. Ai tha se një pjesë e protestuesve që janë përballur me dhunën janë të mitur dhe ngriti shqetësimin për presionet që, sipas tij, ushtrohen ndaj atyre që duan të protestojnë.Duke iu kthyer deklaratave të kryeministrit për përfshirjen e grupeve ekstremiste në protestë, Hoxha i kundërshtoi ato me ironi të fortë.
“Ata që janë në protestë nuk i përdor ANTIFA, as terroristët. Sipas kryeministrit, mbrapa fshihet një forcë madhore, por kjo nuk ka të bëjë me realitetin”, deklaroi gazetari.
Në fund, Hoxha përdori një tjetër thumbim ndaj Ramës, duke ironizuar pretendimet se protesta lidhet me lëvizje të huaja dhe me përpjekje për të rrëzuar kryeministrin.
“Rama është vetë ANTIFA, është derr në thes aty brenda. Tani, papritur, ANTIFA do të rrëzojë liderin global”, u shpreh ai.
Deklaratat e Hoxhës e zhvendosin debatin te përgjegjësia e qeverisë për pakënaqësinë qytetare, gjendjen e arsimit dhe mënyrën se si trajtohen protestuesit. Mesazhi i tij është se, në vend që të kërkojë armiq të jashtëm pas çdo proteste, Rama duhet të përballet me kërkesat dhe pakënaqësitë që po shprehen brenda vendit.
