Kryebashkiaku i Tiranës, Erion Veliaj, ka reaguar nga qelia pas humbjes së Aleksandër Vuçiçit në zgjedhjet parlamentare në Serbi, duke përshëndetur fitoren e lëvizjes studentore që prej dy vitesh protestonte kundër qeverisjes së tij.
Por deklarata e Veliajt, përtej zhvillimeve në Beograd, ka tërhequr vëmendje edhe për mesazhin që mund të përcjellë ndaj kryeministrit Edi Rama, në një kohë kur edhe Shqipëria po përballet me protesta studentore që kërkojnë largimin e qeverisë.
“Urime studentëve për rrëzimin e makiavelistit dhe populistit të Beogradit!”, shkruan Veliaj në rrjetet sociale, duke iu referuar humbjes së Vuçiçit përballë Listës Studentore në zgjedhjet e 25 tetorit.
Në vijim, kryebashkiaku socialist bën një deklaratë që mund të interpretohet edhe në kontekstin e situatës politike në Shqipëri.
“Lëvizjet dhe protestat studentore nuk janë ‘fundi i botës’, por fundi i ‘një bote’. Sa më shpejt ta kuptojmë këtë si qytetarë e politikëbërës, aq më mirë do të dimë t’u përgjigjemi nevojave dhe pritshmërive të kësaj gjenerate”, shprehet ai.
Këto fjalë vijnë në një moment kur studentët në Tiranë po protestojnë kundër qeverisë së Edi Ramës, ndërsa Veliaj, ndonëse pjesë e Partisë Socialiste, nuk ka bërë një reagim të ngjashëm publik për protestat në Shqipëri.
Pikërisht ky qëndrim ngre pyetjen nëse urimi për studentët serbë është thjesht një koment mbi zhvillimet në vendin fqinj apo edhe një mesazh i tërthortë për Ramën.
Duke theksuar se protestat mund t’i japin fund një mënyre qeverisjeje, Veliaj duket se mbështet idenë se asnjë pushtet nuk është i përhershëm dhe se politika duhet t’u përgjigjet kërkesave të brezit të ri.
