Gazetari Robert Papa ka komentuar në “Fokus Tv” letrën e publikuar në median “Fox News Digital” nga dy kongresmenët amerikanë, Joe Wilson dhe Keith Self, drejtuar Sekretarit të Shtetit, Marco Rubio. Në letrën e bërë publike, ligjvënësit amerikanë kërkojnë zbatimin e sanksioneve “non grata” dhe mbështetjen e SPAK-ut për hetimet deri në nivelet më të larta për pushtetarët e korruptuar shqiptarë.
Përmes kësaj letre, Papa thekson pretendimet për korrupsion, tjetërsimin e zonave të mbrojtura në Zvërnec dhe ekzistencën e pasurive të dyshuara në hapësira offshore, nga Manhattan-i deri në Ishujt Cayman. Mbështetur në këto zhvillime, analisti ngre pretendime për rritje të pasigurisë brenda mazhorancës, përpjekje për amnisti politike nga ana e kryeministrit, si dhe për lëvizjen e familjes së tij drejt Dubait.
Pjesë nga analiza e Robert Papës në “Fokus Tv”
“Ç’po ndodh me autokratin dhe diktatorin e fundit të Partisë Socialiste? Ka rrjedhur. Unë i kërkova zyrtarisht Departamentit Amerikan të Shtetit një qëndrim në lidhje me protestën dhe me personin që është nën hetim nga CIA, FBI edhe nga DEA. Mbështesin protestën, por nuk duan dhunë. Por shuplaka ka ardhur nga kongresmeni Wilson dhe Keith Self (kryetari i nënkomisionit të Evropës në Kongres). Në letrën që i ka dërguar Sekretarit të Shtetit de jure Marco Rubio-s, kanë kërkuar me ashpërsi që të përdorë atë mekanizëm që u përdor ndaj Berishës për sanksionime, duke kërkuar haptas për Ballukun, për personat që mbështesin Ballukun dhe Ramën, si dhe kërkon mbështetje të plotë të SPAK-ut.
Gjithashtu, e çuditshme është që Wilson-i është i Partisë Republikane, afër me presidentin Trump, afër me Mar-a-Lago, por Wilson-i në letrën e tij i drejtuar Sekretarit de jure të Shtetit Rubio përmend dhe padrejtësinë që është bërë me tokat e mbrojtura, zonat e mbrojtura të Zvërnecit. Pra, Wilson-i distancohet nga Sekretari i Shtetit de facto Kushner. Në disa nga intervistat që kam pasur me ambasadorin Bolton është thënë qartë që Sekretari i Shtetit de facto është Kushner, sepse nuk mund të jesh Sekretar Shteti kur ty askush nuk të pyet për Ukrainën, për Iranin dhe problemet kardinale. Edhe pse Rubio ka dy poste (Këshilltar i Sigurisë Kombëtare, një post shumë i lartë, dhe Sekretar i Shtetit), Rubio kërkon të jetë besnik, të mos dalë nga konturet, me ëndrrën e tij që të jetë kandidat për president.
A tregon kjo një përplasje midis legjislativit dhe ekzekutivit, apo tregon qartë që sferat e pushtetit që nuk janë servile me Trump-in dhe Kushner-in mbështesin ndryshimin e regjimit në Shqipëri? Rrallëherë letra të tilla bëhen publike, dhe janë bërë në një media digjitale, Fox News Digital, që është nga krahu i Trump-it, edhe pse herë pas here Trump-i ka nota sharje dhe kritike kur Fox News nxjerr sondazhet (polls) në ulje për presidentin amerikan. Doja të veçoja që tek letra e Wilson-it një shuplakë e madhe është ndaj ambasadorit pensionist, edhe pse 62-vjeçar, në Tiranë. Heshtja e ambasadës amerikane në Shqipëri e ka marrë këtë shuplakë në mënyrë të merituar. Në qoftë se shikojmë, procedurat e ndëshkimit të Berishës filluan nga ambasada. Përse kjo ambasadë sot nuk fillon procedura të tilla për non grata?
Dhe me sa duket, tek mundësitë e shporrjes së Ramës është SPAK-u, i cili mbështetet nga ajo pjesë e pushtetit të republikanëve që nuk është servile me Trump-in, por synohet edhe nga Kongresi me trysni ndaj Departamentit Amerikan të Shtetit. Mënyrat për të hequr Ramën janë: të pranohet dorëheqja e tij, sepse ai ka kohë që kërkon të ketë amnisti dhe të mos ndëshkohet nga amerikanët. Ka frikë sepse e di sa thellë është zhytur në korrupsion dhe në trafiqe. Varianti i dytë, me Avni Rustemin, nuk përjashtohet. Dhe varianti i tretë është ky: deklarimi non grata, shkuarja me SPAK-un për të kërkuar mandatin e tij, hapjen e hetimeve duke arrestuar të vëllain, bashkëshorten, trysni të madhe ndaj atyre figurave që nuk kanë imunitet, siç ishte rasti i guvernatorit hajdut të bankës që ai kërkon ta mbrojë.
Megjithatë, hetimet janë shumë të thella. Janë dy ish-zëvendëskryeministra që kanë lidhje me miliona dhe me miliarda. Njëri ndodhet dhe kërkon azil në Zvicër (nuk ia japin, ka synuar disa herë të vijë në Amerikë, s’ka ardhur, nuk e ka bindur), mbase dhe Balluku, e cila del se është shumë herë më tepër se Rama pronare e pasurive të pista, që nga Manhattan-i, Ishujt Cayman dhe kudo. Varianti më i mundshëm do të ishte largimi sipas skenarit serb, me një lëvizje studentore, çka do të shkatërronte klasën e vjetër politike. Por kjo do të merrte kohë, sepse nuk është akoma legjislacioni për të mundësuar që kjo të ndodhë, sepse sistemi patronazhist i krijuar nga Rama përsëri do të vidhte zgjedhjet. Pra, amerikanët me zgjuarsi kërkojnë ta heqin Ramën nga ekuacioni, siç e kanë hequr, duke bërë edhe trysni.
Atë ditë që ai nxori forcat kriminale me armë të RENEA-s, në qoftë se protestuesit do të kishin qëndruar edhe 30 minuta më shumë trysni, do ta digjnin zyrën e kryeministrit, dhe kjo e tmerron atë. Ndaj ka gjasa që familjen e ka larguar në Dubai. Ka kohë që kërkon të shesë aksionet e tij të fshehta, askush nuk po ia blen me politikat e reja të taksave. Në qoftë se këtë do ta kishte bërë që muajin e parë si kryeministër, unë do ta mbështesja, sepse del kundra oligarkëve e më në fund kalon tek një parti socialiste, ish-Partia e Punës. Por ai nuk e ka me sinqeritet, ose tregon që oligarkët kanë filluar ta shesin, sepse oligarkët që janë sot me të kanë qenë nga krahu tjetër. Krimi ordiner dhe trafikantët nuk e shpëtuan dot, dhe ai këtë e pa.
Ka nisur një lloj përplasje brenda partisë gjakësore, ish-Partia e Punës. Mbase është një variant tjetër që mund ta shkarkojnë nga vetë deputetët e tij, në qoftë se amerikanët investohen dhe në qoftë se pensionistit i del gjumi në ambasadën amerikane në Tiranë. Por kongresmeni Wilson dhe Keith kanë kërkuar 5 nëntorin. Në 3 nëntor janë zgjedhjet dhe në janar Wilson-i dhe Keith mund të mos e kenë atë fuqinë e madhe, sepse Kongresi mund të shkojë nga demokratët. Për herë të parë ndodh kjo përplasje që Kongresi i dërgon një shuplakë Rubios, duke mos qenë e partisë tjetër, sepse ne pamë që menjëherë demokratët kërkuan hetim ndaj një figure të ndyrë për çështjen shqiptare si Kushner-i, por nuk e kanë këtë forcë të bëjnë gjë. Por në çastin që marrin Kongresin, kjo ndodh.
Shkrim nga gazetari Robert Papa
