Nesër pritet të zhvillohen disa protesta në Tiranë, në një ditë që parashikohet të jetë e ngarkuar me zhvillime politike dhe qytetare.
Studentët kanë njoftuar se do të marshojnë drejt Ministrisë së Arsimit, në kuadër të protestës kundër qeverisë, ndërsa Partia Demokratike ka paralajmëruar një tubim në orën 12:00.
Në këtë klimë protestash, edhe Erjon Vishkulli ka ndarë një thirrje në rrjetet sociale. Ai ka rishpërndarë një postim ku qytetarët ftohen të mblidhen në orën 14:00, duke iu bashkuar kështu thirrjeve për një tjetër tubim.
Kujtojmë që Vishkulli është i riu që mbeti i plagosur në sy gjatë protestës së mëparshme, pasi u godit nga një plumb gome.
Ngjarja dhe dëmtimi i tij janë kthyer në një nga çështjet e diskutuara pas përplasjes mes protestuesve dhe policisë.
