Është ndarë nga jeta profesori i njohur i Fakultetit Ekonomik në Universitetin e Tiranës, Sulo Hadëri.
Ekonomist në profesion, Sulo Hadëri ka qenë edhe ish-Dekan i Fakultetit të Ekonomisë. Ai është ndarë nga jeta në orët e vona të mbrëmjes së djeshme.
Gjatë një karriere që shtrihet në më shumë se katër dekada, Profesor Hadëri la një gjurmë të thellë në sektorin akademik dhe financiar të Shqipërisë.
Sulo Hadëri shërbeu si Dekan i Fakultetit të Ekonomisë në Universitetin e Tiranës nga viti 2012 deri në vitin 2016, duke mbajtur më parë pozicione si Zëvendësdekan (2008–2012) dhe Drejtor i Departamentit të Ekonomisë (2003–2008).
Ishte anëtar i Këshillit Mbikëqyrës të Bankës së Shqipërisë nga viti 1999 deri në vitin 2006 dhe shërbeu si këshilltar i Ministrit të Financave nga viti 1997 deri në vitin 1999.
Sulo Hadëri kontribuoi me ekspertizën e tij në borde të ndryshme publike dhe rregullatore, duke përfshirë shërbimin si anëtar i bordit të Albkontroll dhe Bordit të Akreditimit të Shqipërisë.
Profesor Hadëri është autor dhe bashkëautor i shumë teksteve themelore ekonomike që përdoren gjerësisht në shkollat e mesme dhe universitete.
Kontributet e tij të gjera shkencore përfshinin gjithashtu 25 artikuj kërkimorë të botuar në revista kombëtare dhe ndërkombëtare dhe 24 prezantime në konferenca.
