Krahas betejës frontale Rama-Veliaj për Bashkinë e Tiranës, një tjetër luftë e nëndheshme po zhvillohet mes socialistëve për Bashkinë e Durrësit. Arkend Balla, deputeti më i votuar në qarkun e Durrësit me 18,715 vota, po lobon për t’u konfirmuar kandidat i PS-së për Bashkinë e Durrësit, një nga pushtetet më të lakmuara të qeverisjes lokale. Por, për t’u ulur në karrigen e kryebashkiakut të Durrësit, Arkend Balla, duket se ka disa pengesa.
Së pari, Balla duhet të dobësojë dhe nxjerrë jashtë loje kryebashkiaken aktuale të Durrësit, Emiriana Sako, një nga zyrtaret më të lakuara për afera korruptive në Shqipëri, por që për shkak të mefshtësisë dhe elasticitetit konjoktural ka ende besimin e kryeministrit Edi Rama, i cili do të thotë fjalën e fundit për kandidatët. Balla sjellë më shumë siguri se sa Sako për të fituar bashkinë, por nga ana tjetër edhe Sako mund t’i sjellë më pak telashe Ramës në raport me krimin dhe pasojat e veprimit të mundshëm të SPAK-ut.
Së dyti, Arkend Balla duhet të spostojë kandidatë të tjerë potencialë brenda PS-së, si Ani Dyrmishi, i cili ashtu si Balla, është skeduar si investim i grupeve kriminale dhe pjesë së dosjes së famshme 339. Që të dy, si Balla, ashtu si Dyrmishi mbështeten nga grupe të forta interesash dhe sidomos nga linja të krimit të organizuar.
Së treti, Arkend Balla është skeduar dhe lakuar si investim i grupit kriminal të Troplinëve, i cili ka nën kontroll Durrësin dhe sidomos portin. Nëse lidhja e Ballës me Po-jën është në nivel akuzash, lidhja e tij me linjën kriminale Danaj të Vlorës është e provuar. Në këtë kuadër, Arkend Balla konsiderohet edhe si ekuivalenti i Sara Milas sa i takon ndikimit të krimit jo vetëm në futjen e tyre në Kuvend, por edhe në mesazhin e përcjellë përmes rezultatit. Kjo ngarkesë kriminale e bën Arkend Ballën më të ekspozuar nga veprimi i SPAK-ut, rapotet ndërkombëtare dhe akuzat politike.
Së katërti, Arkend Balla, edhe pse prodhon më shumë siguri tek pushteti për të mbajtur nën kontroll Bashkinë e Durrësit, deputeti ka disa probleme me pasurinë, të cilat mund t’i shndërrohen edhe në çështje të mundshme penale. Në 2023, Balla ka deklaruar 2.5 milionë euro në një llogari bankare, me burim të ardhura nga paga. Nëse nuk është një lapsus, kjo shumë parash është tejet e dyshimtë dhe e pajustifikuar. Nga ana tjetër, bashkëshortja e tij ka deklaruar një makinë me vlerë 70 mijë euro, me burim dhuratë.
Gjithsesi, Arked Balla duket se është i vendosur në ambicien e tij për të garuar për kryebashkiak të Durrësit. Balla mësohet se ka nisur një lëvizje të kamufluar sabotimi dhe goditje ndaj Emiriana Sakos. ‘Komploti’ konsiston në forcimin e pozitave të tij brenda strukturave të PS-së, gërryerjen e mbështetjes për Sakon, në sulme dhe akuza të tërthorta./Prapaskena.com
