Përplasja mes kryebashkiakut të Tiranës, Erion Veliaj, dhe kryeministrit Edi Rama po merr përmasa të reja, duke u zhvendosur tashmë edhe në Kuvendin e Shqipërisë.
Përmes një deklarate publike këtë të mërkurë, më 11 nëntor, Veliaj ka njoftuar se i është drejtuar zyrtarisht kryetarit të Grupit Parlamentar Socialist, Taulant Balla, duke kërkuar ngritjen e një komisioni hetimor parlamentar për presionet dhe kërcënimet që pretendon se i janë ushtruar nga kryeministri Edi Rama, përmes ministrit të Drejtësisë, Toni Gogu.
Në qendër të përplasjes është takimi i zhvilluar në burgun e Fierit mes Veliajt dhe Gogut, gjatë të cilit kryebashkiaku pretendon se ministri i ka përcjellë mesazhe dhe ultimatume politike në emër të Ramës.
Por deklarata e fundit përmban edhe një element të ri: kërkesën për ruajtjen e menjëhershme të provave dokumentare dhe audiovizive.
Kjo kërkesë rikthen në vëmendje informacionet e qarkulluara më herët se biseda mes Veliajt dhe ministrit të Drejtësisë në burg mund të jetë regjistruar.
Përmes referimit ndaj provave audiovizive, Veliaj u jep peshë aludimeve për ekzistencën e një materiali të mundshëm regjistrues të takimit, megjithëse në deklaratën e tij nuk konfirmon shprehimisht se disponon një përgjim apo regjistrim të bisedës me Gogun.
Ekzistenca e një materiali të tillë dhe përmbajtja e tij nuk janë konfirmuar zyrtarisht.
Në deklaratën e publikuar në rrjetet sociale, Veliaj kërkon që Kuvendi të hetojë nëse transferimi i tij nga paraburgimi i Durrësit në atë të Fierit dhe kushtet e paraburgimit janë përdorur si instrumente presioni për ta detyruar të pranonte organizimin e protestave në Tiranë dhe të jepte dorëheqjen nga mandati i kryetarit të bashkisë.
Ai shprehet se është i gatshëm të dëshmojë nën betim përpara Kuvendit, të përballet me ministrin Toni Gogu dhe të paraqesë çdo provë që disponon.
Veliaj kërkon gjithashtu që kryeministri Edi Rama t’i nënshtrohet të njëjtit standard llogaridhënieje.
Kërkesa i është drejtuar pikërisht shumicës parlamentare socialiste, pjesë e së cilës është edhe vetë kryebashkiaku në aspektin politik.
Sipas Veliajt, kontrolli kushtetues mbi qeverinë nuk mund të kushtëzohet nga përkatësia politike e personave që duhet të japin llogari.
Ai ka njoftuar se për pretendimet e tij ka vënë në dijeni edhe Kongresin e Autoriteteve Lokale dhe Rajonale të Këshillit të Europës, si dhe trupin diplomatik të akredituar në Shqipëri.
Përplasja mes Ramës dhe Veliajt u bë publike pas vizitës së ministrit Toni Gogu në burgun e Fierit më 30 tetor.
Veliaj pretendon se gjatë takimit i janë përcjellë kërkesa për të hequr dorë nga drejtimi i Bashkisë së Tiranës dhe për të pranuar përgjegjësi lidhur me protestat në kryeqytet.
Nga ana tjetër, ministri Gogu e ka konfirmuar zhvillimin e takimit, por ka mohuar kategorikisht se i ka përcjellë kryebashkiakut kërcënime apo ultimatume politike.
Sipas versionit të ministrit, vizita kishte për qëllim njohjen me kushtet e trajtimit të Veliajt në paraburgim dhe shqetësimet e ngritura nga mbrojtja e tij.
Tashmë, përmes kërkesës drejtuar Taulant Ballës, Veliaj kërkon që pretendimet dhe rrethanat e takimit të bëhen objekt i një hetimi parlamentar, ku të administrohen edhe provat e mundshme audiovizive.
Kjo e vendos shumicën socialiste përpara kërkesës për të hetuar pretendime që prekin drejtpërdrejt kryeministrin dhe ministrin e Drejtësisë.
Mbetet për t’u parë nëse Grupi Parlamentar Socialist do ta marrë në shqyrtim kërkesën për ngritjen e komisionit hetimor dhe nëse do të ketë një verifikim zyrtar për ekzistencën e regjistrimeve të mundshme të takimit në burgun e Fierit. /skyweb.al
