Prej 8 tetorit 2026 nuk ka asnjë gjurmë të Inez Hajrullës. Sipas informacioneve ai është rrëmbyer në Tiranë dhe ende nuk dihet fati i personazhit të njohur në botën e krimit në Vlorë.
I njohur edhe si “Ini i Çones”, Hajrulla kërkohet nga SPAK për vrasje, grup të strukturuar kriminal dhe trafik ndërkombëtar droge.
Gazetari Artan Hoxha ka thënë se ka qenë pikërisht Inez Hajrulla, kontakti i fundit i Vis Martinajt, i zhdukur prej gushtit të vitit 2022.
Hoxha shton se dy aleatëve i ka ndodhur e njëjta situatë, ndërsa janë zhdukur pa lënë gjurmë dhe askush nuk di asgjë për fatet e tyre.
“I dogjën bazat atij. Në lumin e Vlorës, në zonën e Selenicës, në zonën… Dhe domethënë i goditën njerëzit rrotull dhe e lanë të vetëm, deri sa ai u rrëmbye në Tiranë dhe është zhdukur. Po që është rrëmbyer dhe është zhdukur.
Pra, identike ka ndodhur si me Vis Martinajn dhe në fakt ky ka qenë një nga njerëzit aleat të Vis Martinajt. Po, madje një nga lëvizjet e fundit që ka pasur Vis Martinaj para se ta rrëmbenin dhe ta vrisnin, ishte pikërisht fakti që kishte qenë në Vlorë te Inez Hajrulla.
Me sa duket Inez Hajrulla ka kujtuar që Tirana është një xhungël kaq e madhe sa ti mund të humbësh, se Tirana është vërtet. Por Tirana ka një problem tjetër, siç është një xhungël kaq e madhe ku ti mund të fshihesh, po kur ti je shumë i njohur dhe shumë i famshëm, janë të gjithë indikatorët që të nxjerrin zbuluar. Dhe ti mund të të rrëmbejnë dhe ata që të kanë në qendër të vëmendjes, të të rrëmbejnë dhe ata të zhduken në xhungël e ti s’e gjen dot tani se çfarë ka ndodhur”, tha mes të tjerash Artan Hoxha.