Një situatë kaotike dhe stresuese është raportuar këtë mëngjes në Spitalin Rajonal të Durrësit, ku qytetarët janë detyruar të presin për orë të tëra pa marrë shërbim. Shkaku, sipas denoncimeve të përsëritura, është mosfunksionimi i sistemit informatik, çka ka paralizuar punën në sportele dhe ka rritur ndjeshëm frustrimin e pacientëve.
Që prej orës 8 të mëngjesit, dhjetëra qytetarë janë grumbulluar në pritje, pa asnjë njoftim zyrtar apo zgjidhje alternative nga stafi mjekësor apo administrativ.
“Mgjesi kemi 2 ore qe presim tek spitali i Durresit. Arsyeja nuk ka sistem,” shprehet një qytetar, i revoltuar nga mungesa totale e informacionit dhe organizimit.
“Persh Joq, shiko ca bohet te spitali i Durrësit. Kemi qe ne 8 dhe skemi ndermen te mbarojm pune ngaqe nuk punon sistemi”, shprehet një tjetër qytetar.
Për shumë prej të pranishmëve, vizitat dhe analizat janë të domosdoshme për trajtimin e problemeve shëndetësore urgjente, por mosfunksionimi i teknologjisë po i bllokon edhe ato pak shërbime bazë që duhet të garantohen në një institucion publik.
Kjo situatë tregon edhe një herë se mungesa e investimit serioz në infrastrukturën digjitale dhe mirëmbajtjen e sistemeve shëndetësore vazhdon të lërë qytetarët në mëshirë të fatit, duke i bërë pritjet e gjata dhe tensionet një realitet të përditshëm në spitalet publike.