Gjykata e Posaçme ka shpallur fajtor deputetin e Partisë Demokratike, Qani Xhafa, për akuzën e “drejtimit të mjetit në mënyrë të parregullt”, pas një aksidenti rrugor, i ndodhur në mars 2023 ndërsa ai drejtonte makinën në gjendje të dehur.
Deputeti u dënua fillimisht me 9 muaj burg, dënim që u ul në 6 muaj për shkak të gjykimit të shkurtuar dhe më pas u konvertua në një gjobë prej 900 mijë lekësh. Gjykata urdhëroi që gjoba të paguhet brenda 10 ditëve nga hyrja në fuqi e vendimit.
Avokati i tij kërkoi dënimin minimal ose me punë me interes publik, ose me gjobë pasi Xhafa e kishte pranuar ngjarjen.
“I mbrojturi prej meje ka pranuar ngjarjen. Sjellja e tij tregon që ai është një njeri i arsimuar. Atë ditë ka patur nië feste familjare me miqtë dhe po kthehej në banesë. Kërkojmë dënimin minimum ose detyrimin me punë me interes publik, ose me gjobë”, tha avokati i Xhafës në seancë.
Aksidenti ndodhi më 13 mars të vitit 2023, ndërsa Policia e arrestoi pas ngjarjes Qani xhafën, por ai u lirua një ditë më pas.