Të shtunën mbrëma, Shtetet e Bashkuara të Amerikës kanë kryer një sulm ajror të koordinuar ndaj tre impianteve bërthamore iraniane: Fordow, Natanz dhe Esfahan. Lajmi u konfirmua nga Presidenti amerikan Donald Trump përmes rrjetit të tij social Truth.
“Kemi përfunduar me sukses sulmin ndaj tre objekteve bërthamore. Të gjitha avionët tanë janë larguar nga hapësira ajrore iraniane dhe janë në rrugë të sigurt drejt bazave. Fordow, objekti kryesor, është goditur me një ngarkesë të plotë bombash. Asnjë ushtri tjetër në botë nuk do të kishte mundur ta bënte këtë. Tani është koha për paqe,” deklaroi Trump.
Menjëherë pas sulmit, një llogari e lidhur me Gardën Revolucionare iraniane publikoi në platformën X: “Tani ka nisur lufta”, duke e cilësuar këtë sulm si një akt lufte të mirëfilltë.
Ministri i Jashtëm iranian, Abbas Araghchi, e quajti sulmin “një sjellje kriminale” me “pasoja të përjetshme”. Ai theksoi se programi bërthamor i Iranit ka natyrë paqësore dhe akuzoi SHBA-në për “shkelje të rëndë të Kartës së Kombeve të Bashkuara”. “Ne e rezervojmë të drejtën të ndërmarrim çdo veprim për të mbrojtur interesat dhe sovranitetin tonë”, shtoi Araghchi.
Në një fjalim nga Shtëpia e Bardhë, Trump sqaroi se sulmi synonte të ndalonte kërcënimin bërthamor nga “shteti i parë që sponsorizon terrorizmin”. Ai deklaroi se objektet bërthamore iraniane janë “thuajse plotësisht të shkatërruara” dhe i bëri thirrje Iranit të zgjedhë paqen.
Sipas detajeve të publikuara nga CNN, ndaj objektit të Fordow janë hedhur 14 bomba “bunker-buster” nga avionët B-2, secila me peshë 14 ton. Ndërkohë, ndaj impianteve të Natanz dhe Esfahan janë përdorur 30 raketa Tomahawk, të lëshuara nga nëndetëse amerikane nga një distancë prej 650 kilometrash.
Trump falënderoi kryeministrin izraelit Benjamin Netanyahu dhe ushtrinë izraelite për bashkëpunimin, duke theksuar se “kurrë më parë nuk është vepruar si një skuadër kaq e koordinuar.”
Nga ana tjetër, Irani reagoi përmes Organizatës për Energjinë Atomike, duke deklaruar se zhvillimi i industrisë bërthamore do të vazhdojë, pavarësisht sulmeve. Ata e cilësuan këtë industri si një fryt të përkushtimit dhe gjakut të “dëshmorëve bërthamorë”.
Sipas raportimeve të “Haaretz”, si kundërpërgjigje, Irani ka bombarduar me raketa territorin izraelit, duke lënë të plagosur 27 persona.
Kryeministri Netanyahu vlerësoi vendimin e Presidentit Trump, duke thënë: “Historia do të kujtojë se Presidenti Trump veproi për t’i mohuar regjimit më të rrezikshëm në botë armët më të rrezikshme në botë.” Ai shtoi se kjo goditje mund të hapë një të ardhme më të sigurt dhe më të begatë për Lindjen e Mesme.