Ikona e pavdekshme e komedisë italiane, Alvaro Vitali, është ndarë nga jeta në moshën 74-vjeçare, duke lënë pas një trashëgimi të jashtëzakonshme artistike që ka bërë breza të tërë të qeshin. Aktori u shua pasditen e sotme në shtëpinë e tij në Romë, pasi vuante nga një bronkopneumoni e përsëritur. Prej dy javësh ai ishte shtruar në spital, por kishte vendosur të rikthehej në shtëpi, ku edhe mbylli sytë përgjithmonë.
I njohur për publikun shqiptar dhe italian si Pierino – personazhi i çiltër, dinak dhe komik që hyri në histori – Alvaro Vitali nuk ishte thjesht një aktor, por një simbol i kinemasë popullore italiane. Nga humori i pafajshëm i viteve ’70 e deri te satirat televizive të viteve të fundit, ai mbeti gjithmonë i freskët dhe i dashur për publikun.
Vitali lindi më 3 shkurt 1950 në Romë dhe u zbulua nga vetë mjeshtri Federico Fellini, i cili i besoi rolin e tij të parë në filmin “Fellini Satyricon” në vitin 1969. Më pas, ai luajti edhe në filma të tjerë të Fellinit si “I Clowns” dhe “Roma”, duke vendosur themelet e një karriere që do të shpërthente në dekadat që pasuan.
Në vitet ’70 dhe ’80, Vitali u bë një nga figurat më të kërkuara të kinemasë komike italiane, duke luajtur në qindra komedi krah aktorëve të famshëm si Lino Banfi, Edwige Fenech dhe Renzo Montagnani. Me pamjen e tij karakteristike dhe mënyrën unike të të folurit, ai u kthye në ikonë të komedisë erotike italiane – një zhanër që shënoi një epokë të tërë.
Në vitet e fundit, ai fitoi sërish popullaritet falë imitimit të ish-shefit të Ferrari-t, Jean Todt, në emisionin satirik “Striscia la Notizia”, duke u afruar me një brez të ri audiencash.
Humbja e tij lë një boshllëk të madh në kinemanë dhe televizionin italian, por trashëgimia e tij do të jetojë përmes qindra roleve që na kanë bërë të qeshim, të prekim nostalgjinë dhe të rikujtojmë fëmijërinë.
Pusho në paqe, maestro i buzëqeshjes. 🕊️
