Ish-presidenti Ilir Meta, i cili ndodhet në burg që nga tetori i vitit 2024 me urdhër të Prokurorisë së Posaçme (SPAK), ka rrëfyer për herë të parë se ishte paralajmëruar nga miq ndërkombëtarë për arrestimin e tij dhe madje i ishte ofruar azil politik në vende të Bashkimit Europian dhe NATO-s, por ai e kishte refuzuar.
Në një deklaratë nga burgu, Meta zbulon se përpara arrestimit kishte marrë telefonata dhe mesazhe shqetësuese nga të njohur të huaj dhe shqiptarë, të cilët e këshillonin që të mos kthehej në Shqipëri.
“Pata shumë telefonata se ku isha, pasi ishin shpërndarë lajme se po shkoja në Hungari për azil politik. Madje edhe një gazetar i njohur opozitar dhe dashamirës më tha: mos u kthe këto ditë, sa të qetësohen gjërat. Të premten u thashë: pasdite arrij në Rinas, u thuaj të gjithëve të më presin.”, ka deklaruar Meta.
Ai shton se përveç paralajmërimeve për arrest, i ishte ofruar mbështetje për azil politik në disa shtete të rëndësishme ndërkombëtare:
“Shumë miq, të njohur edhe ndërkombëtarë, jo vetëm më paralajmëruan se do më arrestonin, por edhe më ofruan mbështetje për azil politik edhe në vendet e BE dhe NATO-së. Por nuk e pranova.”
Meta thekson se kundërshtarët politikë arritën të izolonin figurën e tij dhe të dobësonin opozitën në opinionin publik, por ai është i bindur se në plan afatgjatë “fitorja i përket atij dhe të gjithë patriotëve”.
Kjo deklaratë vjen në një moment kritik për opozitën dhe klimën politike në vend, duke ngritur sërish pikëpyetje për proceset hetimore, rolin e faktorit ndërkombëtar dhe fatin e lidershipit opozitar në Shqipëri.