Era do të vijojë me intensitet mesatar, me drejtim nga verilindja dhe veriperëndimi, përgjatë gjithë 24 orëshit.

Sot Shqipëria do të mbizotërohet nga kthjellime, me përjashtim të ndonjë vranësire të lehtë në veri dhe verilindje. Vlera minimale për mëngjesin ruhet rreth 15°C në zonat e thella malore, ndërsa përgjatë vijës bregdetare variojnë nga 21°C në brendësi deri në 25°C në zona të izoluara.

Në pjesën e dytë të ditës, pritet shtim gradual i vranësirave në veri e më pas në zonat qendrore. Megjithatë, jugu i vendit do të vijojë i kthjellët. Temperaturat maksimale për zonat malore do të luhaten nga 31°C në juglindje deri në 37°C në verilindje. Në bregdet, termometri ngjitet pranë 38°C, ndërsa në disa qytete si Tirana, Elbasani, Shkodra, Kopliku, Berati, Gjirokastra dhe Fieri priten vlera nga 39 deri në mbi 40°C.

 Pesë ditët në vijim

Moti mbetet i qëndrueshëm dhe përvëlues. Temperatura minimale në rang vendi nuk do të zbresë më poshtë se 16°C, ndërsa maksimalet do të variojnë nga 38°C deri në 41°C. Të enjten parashikohet një rritje e lehtë, ndërsa e shtuna dhe e diela sjellin një freskim të përkohshëm. E hëna rikthen sërish temperaturat e larta.

 Situata në Ballkan

Pjesa më e madhe e Ballkanit do të mbizotërohet nga kthjellime, me vranësira të lehta në veri. Gjatë mesditës, temperaturat do të shënojnë rritje në të gjithë rajonin. Mëngjesi sjell vlera nga 16°C në veri deri në 23°C në jug, ndërsa në mesditë priten temperatura 38–41°C në shumicën e kryeqyteteve të rajonit: Beograd, Bukuresht, Sofje, Podgoricë, Shkup dhe Athinë.

 Europa digjet nga i nxehti

Europa paraqitet e ndarë mes veriut me reshje dhe temperaturë më të moderuar, dhe jugut me diell dhe temperatura ekstreme. Termometri ngjitet në 42°C në Madrid dhe deri në 44°C në gadishullin Iberik. Italia Qendrore regjistron 40°C, ndërsa në jug deri në 43°C. Ballkani gjithashtu mbetet në kuotat 36–42°C, me rrezik të lartë për zjarre dhe ndikim në shëndetin publik.