Sopranoja me famë botërore, Inva Mula, ishte e ftuar këtë mbrëmje në emisionin “Goca dhe Gra” në Top Channel, ku ndau me publikun disa nga momentet më të rëndësishme të karrierës dhe jetës së saj personale. E njohur për zërin brilant që ka mbushur skenat më të mëdha të botës, ajo foli me sinqeritet dhe elegancë për një nga eksperiencat më të veçanta – por njëkohësisht më të hidhura – të jetës së saj artistike: pjesëmarrjen në filmin hollywood-ian “The Fifth Element”, të regjisorit Luc Besson.
Kur u pyet nga moderatoret se sa kishte përfituar financiarisht nga ky rol i jashtëzakonshëm që e bëri të njohur në mbarë botën, përgjigjja e saj habiti shumëkënd:
“Ishte një akt gabim jetësor. Unë shkova me agjentin tim, një njeri me shumë eksperiencë, por edhe ai gaboi. Nga entuziazmi harroi të firmoste të drejtat e autorit.”
Kjo nënkupton se sopranoja shqiptare nuk përfiton asnjë të ardhur nga përdorimi i zërit të saj në një nga filmat më të suksesshëm të viteve ’90, i cili transmetohet ende sot në mbarë botën dhe ka gjeneruar miliona dollarë në shitje dhe të drejta televizive.
E pyetur nëse kjo i sjell ndonjë përfitim financiar sot, Mula u përgjigj qartë:
“Jo! Është me miliona, por i kam thënë vetes që s’ka gjë, pasi fitova përjetësisht admirimin e publikut. Edhe milionat nuk më interesojnë. Më interesojnë njerëzit që kanë parë shfaqjen. Po të kisha milionat, nuk e di nëse do të më interesonte të këndoja më apo jo.”
Fjalët e saj reflektojnë jo vetëm një qasje filozofike ndaj artit, por edhe një përkushtim të sinqertë ndaj vlerave shpirtërore të profesionit të saj. Inva Mula e sheh zërin si mision, jo si burim fitimi. Humbja e milionave nuk e ka lënë bosh, sepse, siç thotë ajo, ka fituar zemrat dhe vlerësimin e publikut ndërkombëtar, një pasuri që nuk matet me shifra bankare.
Ky rrëfim prekës dhe i sinqertë është një dëshmi e rrallë e forcës, klasit dhe përulësisë së një artistje të vërtetë, që në vend të milionave, ka zgjedhur përjetësinë përmes artit. Dhe siç duket, është një zgjedhje që vetëm një zë si i saj mund ta përballojë me aq dinjitet.