Shembet çatia e restorantit të famshëm Essenza në Terracina, një qytet bregdetar në provincën e Latinës në Itali, raporton La Repubblica. Ngjarja ndodhi mbrëmjen e së hënës. Një punonjëse 31-vjeçare e restorantit, Mara Severin, e cila punonte si someliere, u nxorr e gjallë nga rrënojat por vdiq pasi u dërgua në spital.
Rreth 10 persona të tjerë u plagosën nga shembja. Tre prej tyre u shtruan në spital me një prognozë të rezervuar, por asnjëri nuk ka rrezik për jetën. Në kohën kur ndodhi ngjarja kishte shumë klientë, përfshirë edhe turistë të huaj. Zona përreth restorantit të shefit të kuzhinës u mbyll për të kryer operacionet e shpëtimit.
Disa dëshmitarë flasin për dy shembje të veçanta. Ndër hipotezat është edhe moti i keq, veçanërisht erërat e forta. Nuk ra shi në Terracina gjatë ditës, por e gjithë provinca e Latinës ishte nën alarm të verdhë.
Somelierja kishte dhjetë vjet që punonte në restorantin Essenza. E kishte bërë me dije vetë ajo përmes një postimi në Instagram tetorin e kaluar, ku tregoi se si filloi aventura e saj në restorantin e famshëm.
“Kanë kaluar 10 vjet që kur kalova atë portë pa e ditur se çfarë do të më rezervonte ajo bisedë dhe ajo fundjavë prove. Një udhëtim i gjatë i përbërë nga shumë momente, plot emocione, që nuk ndalet por vazhdon në atë rrugë.”
