“Është me të vërtetë një shoqëri deri diku e çuditshme, sepse po vuajmë akoma këto efektet post komuniste”
“Flet” është një podkast pa filtra, i drejtpërdrejtë dhe i vërtetë. Me rrëfime të sinqerta nga të ftuarit, pa doreza dhe me deklarata të fuqishme dhe të pathëna më parë. I ftuar në këtë episod të katërt të “Flet” me Ilnisa Agolli, ka qenë Ermal Mamaqi, për një bisedë mes artit, biznesit dhe televizionit…
Pjesë nga intervista:
Është një shprehje e jotja që e ke përdorur në një dalje publike, ku thua “Shqiptari gjakun ta fal, fëmijën ta fal, por suksesin nuk ta fal”…
Është me të vërtetë një shoqëri deri diku e çuditshme, sepse po vuajmë akoma këto efektet post komuniste, por ajo që unë i këshilloj njerëzve, është që të jenë mirënjohës dhe të jenë të dëshiruar për suksesin e tjetrit dhe ta shikojnë një njeri të suksesshëm me admirim. Sepse ti tërhiqesh nga njerëzit të cilët i shikon si model dhe do të bëhesh si ata dhe jo t’i luftosh.
Si shkove te bota e biznesit
Duket e fortë, por unë besoj që edhe familja është biznes, nëse ti do ta shikosh si një biznes për shembull, ti investon tek biznesi dhe biznesi të kthen. Ti investon kohë te fëmijët e tu, ti shikon që fëmijët ndryshojnë dhe të duan më shumë. Kur investon diçka te gruaja jote, gruaja jote të do më shumë. Unë u futa në botën e biznesit dhe besoj që çdo gjë është biznes, edhe arti, edhe trajnimet, edhe çdo gjë tjetër. Dhe që të funksionojë, duhet të trajtohet si biznes. /TAR/
Ermal Mamaqi ka vendosur të flasë hapur për vendimin e tij për t’u tërhequr nga televizioni. I ftuar në podkastin “Flet” me Ilnisa Agollin, ai tregoi për herë të parë arsyet që e çuan drejt këtij vendimi, duke pranuar se e ndjeu se ishte momenti për të mbyllur një kapitull të rëndësishëm në karrierën e tij.
Pjesë nga intervista:
Pse je shkëputur nga bota e televizionit?
Mendoj se unë jam shumë elastik në transformimin e këtij personazhit tim, ta vendos në industri të ndryshme. Dhe mendoj që koha ime për atë show që unë bëja, nga “6 ditë pa Ermalin”, “Xing me Ermalin”, pra ‘late night show’, e pashë që isha në rënie. E di kur është momenti më i mirë për ta mbyllur një bisedë me dikë? Kur gjithçka po funksionon, në ‘peek state’, kur jemi të gjithë duke qeshur, ti thua ‘natën, ika unë’. Dhe ngelet një shenjë, ngelet një ndjenjë, sa bukur ia kalova…
A është një ndjenjë që të mashtron televizioni?
Televizioni është një mashtrim i madh.
Të mungon televizioni?
Nuk më mungon me thënë të vërtetën. Kur e realizon veten në forma të tjera, ndihesh i përmbushur dhe nuk ndjen më mungesën e ekranit.
Mendon të rikthehesh?
Më kanë ardhur disa oferta, televizione të ndryshme. I kam falënderuar, por nuk më kanë bindur. Nëse do të vinte një projekt ndryshe, sfidues, do ta pranoja me kënaqësi.
Si të duket bota e televizionit sot?
Televizioni është në vuajtje të madhe tani. Telefoni dhe rrjetet sociale e kanë fituar luftën me kohë.
