Kryeministri Edi Rama ka deklaruar sot se Shqipëria do të hapë të gjithë kapitujt e negociatave me Bashkimin Europian brenda muajit nëntor 2025, duke e cilësuar këtë një arritje të paprecedentë dhe rekord në historinë e procesit të zgjerimit të BE-së.
Në një deklaratë publike, Rama theksoi se objektivi është “tejet ambicioz”, por sipas tij, Shqipëria i ka kryer të gjitha detyrat e nevojshme për të avancuar me këtë ritëm.
“Ne i kemi bërë gjërat e duhura dhe Komisioni Europian është përgjigjur me ritmin e duhur, për të arritur deri në fund të vitit 2027 për të mbyllur procesin. Të gjitha gjasat janë që në vjeshtë do t’i hapim të tërë kapitujt – që është rekord në historinë e procesit të integrimit”, deklaroi kreu i qeverisë.
“Një gjë është t’i hapësh, tjetër t’i mbyllësh”
Rama theksoi megjithatë se hapja e kapitujve nuk është fundi i rrugës, por fillimi i një etape shumë më të vështirë – mbyllja e tyre, që kërkon përmbushje të plotë të standardeve të BE-së.
“Një gjë është t’i hapësh kapitujt, një gjë tjetër është t’i mbyllësh. Mbyllja e tyre kërkon përmbushjen e detyrimeve konkrete në çdo fushë – nga drejtësia te mjedisi, nga konkurrueshmëria ekonomike te të drejtat sociale. Anëtarësimi nuk është thjesht formal, por kërkon të jesh realisht gati për të qenë pjesë e asaj skuadre,” – u shpreh Rama.
Nga dëshira për t’u afruar, te dera e hapur: “Duhet të provojmë që jemi gati”
Kryeministri bëri një krahasim simbolik, duke e përshkruar rrugëtimin europian si një kalim nga dëshira për të hyrë në shtëpinë e BE-së, në fazën ku dera është hapur, por duhet të provosh që je “veshur, stërvitur dhe edukuar” siç duhet për të hyrë brenda.
“Kemi kaluar nga faza kur dëshironim të afroheshim me BE, në fazën që e kemi derën hapur. Tani duhet të provojmë se jemi veshur mirë, stërvitur mirë, edukuar mirë – për të hyrë në atë derë dhe për t’u ulur në atë tryezë,” – theksoi ai.
Çfarë do të thotë “hapja e të gjithë kapitujve”?
Në procesin e anëtarësimit, një shtet kandidat përgatitet të adoptojë legjislacionin dhe standardet e BE-së në 35 kapituj të ndarë sipas fushave. Shqipëria aktualisht ndodhet në fazën e skriningut të thelluar për çdo kapitull. Hapja formale e të gjithë kapitujve nënkupton një njohje politike dhe teknike nga BE se vendi është në nivel të mjaftueshëm për të filluar punën konkrete për përafrimin e legjislacionit dhe plotësimin e standardeve për secilën fushë.
Nëse ky hap arrihet deri në nëntor, Shqipëria do të jetë ndër vendet që ka ecur më shpejt në këtë fazë të procesit, krahasuar me vendet e tjera të Ballkanit Perëndimor në të kaluarën.
Megjithatë, sfida më e madhe mbetet përpara: mbyllja e kapitujve, reformat substanciale dhe bindja e të gjitha vendeve anëtare se Shqipëria është realisht gati të bëhet pjesë e familjes europiane.